Aldaǵy kúnderi Qazaqstannyń shyǵysynda qar erıdi – Qazgıdromet boljamy
ASTANA. KAZINFORM –«Qazgıdromet» RMK baspasóz hatshysy Alına Ismagýlova Qazaqstan ózenderindegi sý jaǵdaıyn baıandady.
«Atmosferalyq frontaldy bólimder Qazaqstannyń kóp bóliginde jańbyrly aýa raıyn týdyrady, jel soǵady, ońtústiktiń taýly aımaqtarynda qatty jańbyr kútilýde, eldiń soltústiginde jaýyn-shashyn (negizinen jańbyr) bolady. Tek respýblıkanyń shyǵysynda antıtsıklon áserinen jaýyn-shashynsyz aýa raıy kútiledi. QR boıynsha naızaǵaı, tuman bolady, eldiń ońtústiginde jel kúsheıedi dep kútilýde», - dedi spıker Respýblıkalyq aqparattyq shtabta ótken brıfıngte.
Sońǵy táýlikte Aqmola, Shyǵys Qazaqstan jáne Abaı oblystary boıynsha 5 daýyldy gıdrologııalyq eskertý shyǵaryldy.
Atap aıtqanda, Aqmola oblysynda Balqashyn aýylyndaǵy Jabaı ózeniniń gıdrologııalyq beketinde sý deńgeıiniń kóterilýi jalǵasýda, 4 saǵat ishinde 27 sm sý tolǵan.
Derjavınsk qalasyndaǵy Esil ózeniniń gıdrologııalyq beketinde sý deńgeıi 12 saǵatta 21 sm-ge artyp, qaýipti 15 sm deńgeıinen asqan.
Aqmola oblysy Býdenovka aýylyndaǵy Arshaly ózeniniń gıdrologııalyq beketinde sý deńgeıi 8 saǵat ishinde 80 sm-ge kóterilgen. Saǵ. 00:00 jaǵdaı boıynsha sý deńgeıi – 1080 sm (qaýipti deńgeı - 1090 sm), gıdrobeket muzdan tazartyldy.
«Shyǵys Qazaqstan jáne Abaı oblystary aýmaǵynda 14-18 sáýirde temperatýra kóteriledi jáne 16 sáýirden bastap jańbyr men jylbysqy qar túrinde jaýyn-shashynnyń boljanyp otyr. Sondaı-aq qardyń qarqyndy erýi jalǵasqandyqtan, erigen qar sýynyń betkeıge jaıylýy, ózenderdegi sý deńgeıiniń ary qaraı kóterilýi kútiledi», - dedi spıker.
