Aldaǵy kúnderi elimizdiń basym bóliginde jańbyr men naızaǵaı kútiledi
ASTANA. KAZINFORM — «Qazgıdromet» RMQ 9-11 maýsymǵa arnalǵan aýa raıy boljamyn jarııalady.
Baıaý jyljıtyn batys tsıklony Qazaqstan aýmaǵynyń basym bóligine yqpalyn saqtaıdy. Soǵan baılanysty aýa raıynyń qubylmaly sıpaty saqtalady: jańbyr jaýyp, naızaǵaı oınaıdy, ekpindi jáne daýyldy jel kúsheıedi, keı jerlerde burshaq jaýýy múmkin.
Sınoptıkterdiń boljamynsha, qatty jańbyr 9-11 maýsym kúnderi respýblıkanyń soltústik-batysynda jáne soltústiginde sondaı-aq 11 maýsymda ońtústik-shyǵysynda kútiledi.
Kezeńniń basynda shyǵys óńirlerde, al kezeńniń ortasynan bastap ońtústik-batys óńirlerde jaýyn-shashynsyz aýa raıy basym bolady.
Kúndizgi aýa temperatýrasy:
- elimizdiń batysynda +27…+35°S deıin joǵarylaıdy;
- soltústiginde +17…+28°S deıin tómendeıdi;
- soltústik-shyǵysynda jáne ortalyǵynda aptap ystyqtyń azdap báseńdeýi baıqalyp, +25…+33°S bolady;
- ońtústiginde jáne ońtústik-shyǵysynda +27…+35°S shamasynda saqtalady;
- shyǵysynda +32…+39°S deıin jetetin ystyq aýa raıy saqtalady.
Al búgin Qazaqstannyń 17 oblysy men Astana qalasynda kún raıyna qatysty eskertý jarııalanǵan bolatyn.
