Aldaǵy qysta Pavlodar oblysyna 580 myń tonnadan astam kómir qajet
PAVLODAR. KAZINFORM - Pavlodar oblysyndaǵy áleýmettik mekemeler men jeke sektorlar úshin aldaǵy qysqa 580 myń tonnadan astam kómir qajet. Óńirdiń aldaǵy jylý maýsymyna daıyndyǵy qandaı deńgeıde? Osy oraıda óńirlik energetıka jáne turǵyn úı-kommýnaldyq sharýashylyq basqarmasynyń basshysy Erjan Imanzaıypovty áńgimege tarttyq.
- Ertis-Baıan óńiri qysqa qajet otyndy qanshalyqty qamdap úlgerdi?
- Kúzdiń qara sýyǵynda suranystyń ósip shyǵa keletinin eskere otyryp bizdiń basqarma qala-aýdan ákimdikterine qatty otyndy ýaqytyly daıyndaý boıynsha qajetti sharalardy qabyldaý týraly eskertip jatyr. Oblys aýmaǵynda ázirshe kún jyly, biraq qyrkúıek aıynda kún salqyndap jer úıler pesh jaǵýdyń qamyna kirisedi. Soǵan oraı oblysta kómirge suranys birtindep óse bastaıdy. Aımaǵymyz boıynsha 20-dan astam óńirlik operator bar, olar oblys halqy men áleýmettik obektilerge kómirdi jetkizýdi, saqtaýdy jáne satýdy uıymdastyrady. Qazirgi ýaqytta bıýdjettik uıymdar aldaǵy jylytý maýsymyna kómir satyp alýdyń barlyq konkýrstyq rásimderin aıaqtady. Bıýdjettik mekemelerge jalpy kólemi 240 myń tonna kómir qajet bolsa, qazirgi ýaqytta onyń 198 myń tonnasy jetkizildi.
- Kómir baǵasy bıyl qymbattaýy múmkin be?
- Pavlodar oblysynda kómir óndiretin 6 kenish bar. Atap aıtqanda, «Bogatyr-Kómir» JShS, «Maıkýben-Vest» JShS, «Gamma Taldykól» JShS, «Gamma Sarykól» JShS, «Angrensor Energo» JShS, «Shyǵys kenishi» JShS. Halyq negizinen jergilikti kenishter arasynda «Maıkóbe» kenishiniń kómirin qup kóretini jasyryn emes. Atalǵan kompanııada búginde kómirdiń bir tonnasy 8300 teńgeden bosatylyp jatyr. Al «Bogatyr» kenishinde tonnasy 5611,2 teńge turady. Baǵa byltyrǵy deńgeıde saqtalyp tur. Atalǵan kenishtermen baǵany ustap turý jáne kómirmen qamtý salasynda turaqsyzdyqqa jol bermeýdi kózdeıtin yntymaqtastyq memorandýmyna qol qoıyldy. Sondyqtan baǵa ózgermeýi kerek.
Oblys boıynsha, sonyń ishinde Pavlodar qalasynda kómir satylatyn temirjol tuıyqtary bar. Kómir jetkizetin operatorlar týraly barlyq aqparat, onyń ishinde qoımalarynyń mekenjaılary jáne kómir satyp alýǵa bolatyn jerler bizdiń Instagram paraqshamyzda, sondaı-aq qalalar men aýdandar ákimdikteriniń resmı resýrstarynda ornalasqan.
- Kommýnaldyq-turmystyq sektorǵa shamamen qansha kómir qajet bolady?
- Áleýmettik sala obektilerin jáne oblys halqyn qatty otynmen qamtamasyz etý úshin 2024-2025 jyldardyń jylytý kezeńinde 585 myń tonna kómir jetkizilgen. Onyń ishinde bıýdjettik uıymdar úshin 210 myń tonna (88 myń tonnadan astamy bilim berý uıymdary úshin) jáne kommýnaldyq-turmystyq sektor úshin 375 myń tonna. Bıylǵy kólem de sol shamada bolady dep oılaımyz.
-Oblystaǵy qazandyqtar men jylý stansalary qysqa daıyn ba?
-Jylytý maýsymyna daıyndyq aıasynda oblystyń energetıka kózderinde 46 negizgi jabdyqty jóndeý kózdelgen. Búgingi tańda 22 jabdyqta jóndeý aıaqtaldy, 19 jabdyq jóndelý ústinde. Taǵy 5 qazandyqta jóndeý áli jalǵasyp jatyr. Oblystyń energetıkalyq keshenine jalpy belgilengen qýaty 8542 MVt bolatyn 7 energııa kózi kiredi. 2024 jyldyń qorytyndysyna súıensek, oblystyń energııa kózderi «Bogatyr Kómir» men «Shyǵys» kenishterinen shamamen 34,3 mln tonna kómir jáne 39,1 myń tonna mazýt satyp alyp, tutynǵan.
Buǵan deıin bıyl 7 aıda Qazaqstan qansha kómir eksporttaǵany týraly jazǵanbyz.