Aldaǵy eki jylda Astanada 5 myń muǵalim qajet bolady

ASTANA. KAZINFORM — 2029 jylǵa deıin elordada 80 mektep salynady. Bul týraly Astana qalasy bilim basqarmasynyń basshysy Qasymhan Senǵazyev aıtty.

«Elordada 365 544 balany qamtyp otyrǵan 757 bilim berý uıymy bar. Onyń ishinde 525 balabaqsha, 172 mektep, 32 kolledj, 11 qosymsha bilim berý uıymy jáne 15 arnaıy bilim berý uıymy qyzmet etip jatyr. 2023 jyly bilim berý uıymdarynyń 102 nysany qosyldy», - dedi Q.Senǵazyev Astana qalasynyń kommýnıkatsııalar qyzmetindegi brıfıngte.

Onyń aıtýynsha, balalardy mektepke deıingi tárbıemen jáne oqytýmen qamtýdy ulǵaıtý maqsatynda 2023 jyly 10 214 orynǵa memlekettik tapsyrys ornalastyryldy. Al bıyl taǵy 10 000-nan asa orynǵa memlekettik tapsyrys berilmek. Sonymen qatar, balabaqshalardaǵy oryn tapshylyǵyn joıý maqsatynda aldaǵy jyldary 60 balabaqsha salynbaq. Qazir 10 balabaqshanyń jer telimderi belgilenip, jobalaý jumystary bastalǵan.

«Astana qalasynda 2023 jyly 11 mektep paıdalanýǵa berildi. Jańa mektepter qaladaǵy 3 mekteptiń úsh aýsymdyq máselesin sheshken. Oqý jylynyń aıaǵyna deıin taǵy da tórt mektepti iske qosý josparlanǵan. 2024 jyly 25 mektepti salý eskerilgen. Onyń ishinde jeteýi memlekettik, 15-i jaıly mektep, úsheýi jekemenshik mektep bolady. Jalpy, 2028 jyldyń aıaǵyna deıin 200 myńǵa jýyq orynǵa arnalǵan 80 mektepti salý josparlanǵan», - dedi basqarma basshysy.

Qasymhan Senǵazyevtyń aıtýynsha, jyl saıyn mektep oqýshylary sanynyń ósýine baılanysty 2026-2027 oqý jylyna qaraı Astanada 5 myń muǵalim qajet bolady.

«Astana qalasynda balalardyń qaýipsizdigin saqtaý maqsatynda barlyq bilim berý uıymdary 100% tsıfrly beınebaqylaý kameralarymen, týrnıkettermen, dabyl túımelerimen jáne joǵary jyldamdyqtaǵy ınternet jelisimen qamtamasyz etilgen», - dedi ol.