Aldaǵy eki jylda 3 myńnan astam aýyl joǵary jyldamdyqty ınternetpen qamtamasyz etiledi
ASTANA. KAZINFORM – Aldaǵy 2 jylda 3 myńnan astam aýyl talshyqty-optıkalyq baılanys arqyly joǵary jyldamdyqty ınternetpen qamtamasyz etiledi. Bul týraly búgin Úkimet otyrysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev aıtty.
– Qazaqstan tolyqqandy tsıfrlyq el bolý úshin barlyq qajetti baǵyttar qamtylyp jatyr. Zamanaýı tsıfrlyq ınfraqurylymdy damytý, kıberqaýipsizdikti qamtamasyz ete otyryp, jasandy ıntellekt tehnologııalaryn engizý men aýqymyn keńeıtý boıynsha jumystar júrgizilip jatyr. Búgingi tańda Qazaqstanda 6 myńnan astam aýyldyq eldi meken bar. Onyń ishinde 3 myńnan astam aýyl bıyl jáne kelesi jyly talshyqty-optıkalyq baılanys arqyly joǵary jyldamdyqty ınternetpen qamtamasyz etiledi, - dedi vıtse-premer.
Onyń atap ótýinshe, osylaısha halyqtyń 99 paıyzy joǵary jyldamdyqty ınternetke qol jetkizedi. Alaıda ony iske asyrý úshin jergilikti atqarýshy organdar jer ýchaskelerin bólýge tolyq járdem kórsetýi qajet. Ákimdikterge óz óńirlerinde ınternet sapasyn memlekettik baqylaýǵa jáne aıyppul salýǵa ókilettik berilgen.
- Aýyldarǵa ınternet tartýmen qatar, aýyldaǵy árbir úıge talshyqty-optıkalyq jelisin salý jumystary júrgizilip jatyr. Bul «Sońǵy mıl» jobasy dep atalady. Osy joba aıasynda 400 myńǵa deıin úı sharýashylyǵyna optıka qurylysy kózdelip otyr. Qosymsha 2,5 mln adam qamtylady. Ákimdikterden optıkalyq kabeldi ilý úshin elektrmen jabdyqtaý tirekterine qoljetimdilikti uıymdastyrý talap etiledi, - dedi Jaslan Madıev.
Aıta keteıik, kelesi jyly ushaqtar men poıyzdarda ınternet qoljetimdi bolady.
