Aldaǵy eki jylda 200 tirek mektep jelisi qurylady - Tamara Dúısenova
ASTANA. KAZINFORM — Aldaǵy eki jylda 200 tirek mektep jelisi qurylady. Bul týraly WALS 2024 halyqaralyq konferentsııasynyń ashylý rásiminde Premer-Mınıstrdiń orynbasary Tamara Dúısenova aıtty.
«Birneshe jyl boıy Nazarbaev zııatkerlik mektepteri men Bilim-ınnovatsııa lıtseıleri sııaqty jetekshi mektepterimizdiń tájirıbesin taratý arqyly elimizdiń aýyldy aımaqtarynda tirek mektepter qurý jobasy iske asyrylyp jatyr. Aldaǵy 2 jylda atalǵan joba esebinen 200 tirek mektep jelisin qurý josparlanýda. Bul mektepter aldaǵy ýaqytta alǵan tájirıbesin elimizdegi basqa da aýyl mektepterine taratady. Osyǵan baılanysty „Sabaqty zertteý“ tásiliniń aýqymyn keńeıtý biz úshin ózekti mindet ári bilim berý sapasyn júıeli arttyrýdyń negizgi sharty bolyp otyr. Qazirdiń ózinde bul tásil — elimizdegi muǵalimderdiń biliktiligin arttyrý bilim baǵdarlamasyna engizilgen bólimderdiń biri. Bul Qazaqstan mektepterinde „Sabaqty zertteý“ praktıkasynyń keńinen taralýyna jáne muny pedagogterdiń tereńirek tanýyna yqpal etedi», — dedi Tamara Dúısenova.
Vıtse-premer Qazaqstan mektepterinde Lesson Study tásili «Nazarbaev Zııatkerlik mektepteri» derbes bilim berý uıymy Pedagogıkalyq sheberlik ortalyǵynyń belsendi qyzmetiniń nátıjesinde sátti qoldanys tapqanyn aıtady.
«Ortalyq 10 jyldan astam ýaqyt boıy elimizdegi pedagogter arasynda Lesson Study tásilin belsendi túrde nasıhattap keledi. Búgingi halyqaralyq konferentsııaǵa Qazaqstannan 500-ge jýyq muǵalim qatysyp, onyń 280-i konferentsııa aıasynda irikteýden sátti ótken zertteý abstraktilerin usynady. Bul bizdiń pedagogterdiń „Sabaqty zertteý“ tásilin tabysty engizýiniń aıqyn dáleli dep sanaımyn. Sonymen qatar Pedagogıkalyq sheberlik ortalyǵy Ázerbaıjan, Qyrǵyzstan, Malavı, Túrikmenstan, Tájikstan, Reseı Federatsııasynyń pedagogteri arasynda „Sabaqty zertteý“ ıdeıalaryn ilgeriletý jóninde úlken jumysty bastady. Bul tizimge jaqyn arada ózge de elder qosylady dep úmittenemiz», — dedi Úkimet basshysyny orynbasary.
Aıta keteıik, «Sabaqty zertteý: úzdik oqý men oqytýǵa umtylý» taqyrybymen ótip jatqan WALS-2024 konferentsııasyna 30-ǵa jýyq elden mamandar kelgen.
Negizgi spıkerler qatarynda álemdik bilim berýdiń eń bedeldi sarapshylary: Norvegııadan Oısteın Krıstıansen, Lıtvadan Darıýs Radkevıchıýs, Ulybrıtanııadan Sara Seleznev, Japonııadan Shırlı Tan, Germanııadan Klara Kager bar.
Jalpy, is-sharaǵa 850-den astam adam qatysýda.
