Aldaǵy eki jylda 113 jańa sport nysany salynady - mınıstr

Respýblıka boıynsha aldaǵy eki jylda 113 jańa sport nysany salynady, 26 nysan qaıta jańartylady, dep habarlaıdy Kazinform.

Týrızm jáne sport mınıstri Ermek Marjyqpaev Almatydaǵy jýyrda ǵana qurylysy aıaqtalǵan olımpıadalyq daıyndyq bazasyna bardy. Sport nysany bir ýaqytta 2300 sportshyǵa 23 olımpıadalyq sport túrimen aınalysýǵa múmkindik beredi. Bul nysan úzilissiz jyl boıy jumys isteıdi.

«Sport salasyn damytýdyń strategııalyq baǵdary – Dene shynyqtyrý men sportty damytýdyń 2029 jylǵa deıingi tujyrymdamasy. Bul qujatta aıqyndalǵan negizgi maqsattardyń biri – sport ınfraqurylymyn damytý arqyly halyqtyń sportqa qoljetimdiligin arttyrý. Respýblıka boıynsha aldaǵy eki jylda 113 jańa sport nysany salynady, Memlekettik-jekeshelik áriptestik tetigin qoldana otyryp qoldanystaǵy 26 nysan qaıta jańartylady», - dedi Ermek Marjyqpaev.

Budan ári Ermek Marjyqpaev álemde teńdesi joq jáne kez kelgen formattaǵy kezdesýler ótkizýge múmkindik beretin «Aqbulaq» Olımpıadalyq ortalyǵyn, Ulttyq qurama komandalardyń sportshylaryna dárigerlik baqylaýdy júzege asyrý, sportshylardy qalpyna keltirý jáne ońaltýǵa arnalǵan «Sporttyq medıtsına jáne ońaltý ortalyǵyn», «Sportshylardyń dopıngke qarsy zerthanasyn», QazDQUO Olımpıada Hartııasynda bekitilgen ádil sport qundylyqtaryn qalyptastyrýǵa jáne nyǵaıtýǵa baǵyttalǵan aqparattyq jáne bilim berý baǵdarlamalary arqyly maqsattar men mindetterdi júzege asyratyn Dopıngke qarsy ulttyq ortalyǵyna bardy.

Sonymen qatar «Alataý» qysqy sport túrleri boıynsha Respýblıkalyq joǵary sport sheberligi mektebiniń qazirgi jaǵdaıymen tanysty.