Aldaǵy eki kúnde QQS mólsherlemesi týraly usynystar Parlamentke usynylady

ASTANA. KAZINFORM — Ulttyq ekonomıka mınıstriniń orynbasary Azamat Ámrın Májilis otyrysynan keıin ótken baspasóz máslıhatynda qosylǵan qun salyǵyn talqylaý aıaqtalǵanyn málim etti.

— Memleket basshysynyń tapsyrmasy boıynsha 6 jumys toby búkil óńirlerdi aralap, bıznespen, kásipkerlermen kezdesip shyqty. Sol kezdesýlerde aıtylǵan usynystardy qazir taldap jatyrmyz. Búgin-erteń usynystardy Parlamentke engizemiz, — dedi Azamat Ámrın.

Sondaı-aq, ol kezdesýlerdiń qorytyndysynda qandaı ortaq paıymdar aıqyndalǵanyn atap ótti.

— Qazirgi jaǵdaı boıynsha qosylǵan qun salyǵynyń mólsherlemesi 16 paıyz bolady dep otyrmyz. Kásipkerlermen, ásirese sharýa qojalyqtarynyń ıelerimen kezdesken kezde aýyl sharýashylyǵy úshin QQS mólsherlemesin 0 paıyz etý máselesi aıtyldy. Osy kezdesýlerde kerisinshe QQS-ny qaldyrý týraly usynystar boldy. Sondyqtan biz muny erikti etýdi josparlap otyrmyz. Aýyl sharýashylyǵynyń ókilderi QQS tólegisi kelse, tóleıdi. Densaýlyq saqtaý salasy úshin QQS mólsherlemesi 10 paıyz bolady. QQS salýdyń eń tómengi shegi 15 mln teńge deńgeıinde qalady. Ol másele boıynsha túrli nusqalar aıtyldy. Biraq kásipkerlerdiń kóbi osy shek kerek dep otyr, — dedi vıtse-mınıstr.

Atalǵan kezdesýlerde QQS 16% bolsa, áleýmettik salyq pen zeınetaqy jarnalaryn tóleý ózgerissiz qalatyny aıtylǵan bolatyn.

Osyǵan deıin Memleket basshysy bıznes ókilderimen kezdesýde qosylǵan qun salyǵynyń mólsherlemesi saralanyp belgilenýi tıistigin aıtqan edi.