Aldaǵy demalysta kún kúrt sýytyp, 25-30 gradýs aıaz qaıta oralady

Qazgıdromet sınoptıkteri 6-8 qańtarǵa arnalǵan úsh kúndik aýa raıy boljamyn jarııalady. 

Aldaǵy kúnderi belsendi Atlantıka tsıklony jáne odan týyndaıtyn atmosferalyq fronttardyń áserinen Qazaqstannyń basym bóliginde qar, ońtústik óńirlerde qar aralas jańbyr jaýady. 

6 qańtarda soltústik-batysta qalyń qar jaýady, ońtústikte de mol jaýyn-shashyn bolady.

7-8 qańtarda soltústik-batysta, soltústikte jáne ortalyqta qatty qar jaýady.

Jaýyn-shashynmen qatar respýblıkanyń soltústik jartysynda kóktaıǵaq pen boran soǵady.

Respýblıka boıynsha tuman túsip, jel kúsheıedi. 

Eldiń batysyna, soltústik-batysyna, soltústigine jáne shyǵysyna Soltústik-batys antıtsıklonynyń yqpalymen sýyq aýa massalary keledi.

Osynyń saldarynan aýa temperatýrasy kúrt tómendeıdi. 

Batysta jáne soltústik-batysta túngi ýaqytta kún raıy 8-25 aıazǵa deıin, soltústikte 5-30 aıazǵa deıin, al respýblıkanyń shyǵysynda 5-18 aıazǵa deıin sýytady. 

Ońtústik óńirlerde túngi temperatýranyń negizgi fony mınýs 5 jáne plıýs 7 gradýs sheginde bolady.