Aldaǵy bes jylda Pavlodarǵa tehnıkalyq-kásiptik bilimi bar 56 myńnan astam kadr qajet
PAVLODAR. KAZINFORM - Eńbek naryǵyndaǵy qajettilikti taldaý nátıjeleri ekonomıkada orta kásiptik bilimi bar kadrlarǵa qajettiliktiń artyp kele jatqanyn kórsetip otyr. Aldaǵy bes jylda kásiptik-tehnıkalyq bilimi bar mamandarǵa degen suranys bilimi joǵary túlekterge degen qajettilikten 70%-ǵa asyp ketedi degen boljam bar.
Pavlodar oblysynda memlekettiń ekonomıkany yntalandyrý baǵytyndaǵy belsendi sharalaryna qaramastan, jeke bıznestiń jańa jumys oryndaryn qurýǵa qosqan úlesi shamamen 35%-dy quraıdy. Tıisinshe, búgingi tańda jumys oryndarynyń ósimin ónimdiligi tómen salalar men memlekettik sektor qamtamasyz etip otyrǵan jaıy bar.
Óńirlik jumyspen qamtýdy úılestirý jáne áleýmettik baǵdarlamalar basqarmasynan habarlanǵandaı, turaqty jumys oryndarynyń eń kóp sany bilim berý salasynda - 12,6%, al aýyl sharýashylyǵy, orman sharýashylyǵynda - 10,4%, ónerkásipte - 8,3%.
- Jyl saıyn basqarma orta merzimdi kezeńge (6 jylǵa deıin) eńbek naryǵynyń qajettiligin qalyptastyrý boıynsha jumys júrgizedi. Máselen, 2024-2029 jyldarǵa arnalǵan tehnıkalyq jáne kásiptik bilimi bar bilikti kadrlarǵa qajettilik oblys boıynsha 56420 mamandy quraıdy. Onyń ishinde ónerkásip - 17,8%, kólik jáne qoımalaý - 14,6%, qyzmet kórsetý – 11,3%, ekonomıka jáne býhgalterlik is - 9,7%, bilim berý - 9,1%, densaýlyq saqtaý - 6,9%, qurylys - 4,2%, aýyl sharýashylyǵy - 2,3%. Tujyrymdamalarǵa sáıkes, 2024-2029 jyldary oblys boıynsha 143,9 myń jumys ornyn qurý josparlanǵan, onyń 70%-y turaqty jumys oryndary bolady. Jyl basynan 23,3 myń jańa jumys orny quryldy, onyń 16,4 myńy – turaqty. Bul ótken jyldyń sáıkes kezeńimen salystyrǵanda birshama az,-dep jaýap berdi Kazinform tilshisiniń saýalyna óńirlik jumyspen qamtýdy úılestirý jáne áleýmettik baǵdarlamalar basqarmasynyń basshysy Almıra Dısıýpova.
Búginde Pavlodar oblysyndaǵy jumys kúshiniń sany da azaıǵany baıqalady. Sońǵy bes jylda ol 1,3%-ǵa tómendegen. Jalpy oblystyń eńbek naryǵyndaǵy jaǵdaı turaqty. Jumyssyzdyq deńgeıi 4,8%-dy quraıdy.
Eske sala keteıik, elimizde 13 myńnan asa sheteldik jumys istep júr.
