Aldaǵy bes jylda Ertis-Baıan óńirine elý myńǵa jýyq tehnıkalyq maman qajet bolady

PAVLODAR. KAZINFORM - Aldaǵy jyldary oblysta arnaıy tehnıkanyń júrgizýshileri, dánekerleýshiler, qurylys pen tehnıkalyq baǵyttaǵy mamandarǵa suranys artady degen boljam bar.

Pavlodar oblysynda 2029 jylǵa deıin kadrlarǵa suranys 63,4 myń adamǵa baǵalanyp otyr.

- Olardyń 75%-dan astamy, ıaǵnı shamamen 48,4 myń adam kásibı-tehnıkalyq bilim alǵan mamandar bolady. Bul, eń aldymen, arnaıy tehnıkanyń júrgizýshileri, dánekerleýshiler, qurylys mamandary men jumysshylar, tehnıkalyq baǵyttaǵy mamandar. Aldaǵy 3 jyl ishinde jumys kúshine suranys jyl saıyn 10-11%-ǵa ósedi dep kútilip otyr, - deıdi óńirlik jumyspen qamtýdy úılestirý jáne áleýmettik baǵdarlamalar basqarmasynyń basshysy Almıra Dısıýpova.

Qazir oblysta jańa jumys oryndaryn qurýǵa erekshe nazar aýdarylyp otyr. Jyl basynan memlekettik baǵdarlamalar men jeke bastamalar aıasynda 4 156 jumys orny qurylǵan. Turaqty jumys oryndarynyń eń kóp sany bilim berý (10,7%), aýyl sharýashylyǵy (9%), densaýlyq saqtaý (8%) jáne ónerkásip (7%) salalarynda. Jalpy jergilikti jumyspen qamtý organdary bıyl 26,7 myń adamdy jumysqa ornalastyrýdy josparlap otyr. Onyń ishinde 18,3 myń adam turaqty jumys oryndaryna, 8,4 myń adam ýaqytsha jumys oryndaryna ornalasady.

- Bul sharalardyń qabyldanýy aımaq halqynyń tabysyn arttyrýǵa, kásipkerlik belsendilikti jandandyrýǵa jáne áleýmettik ál-aýqatty jaqsartýǵa múmkindik beredi, - deıdi A.Dısıýpova.

Eske sala keteıik, elimizde 19 kásiporyn 1,2 myńnan asa jumyskerine jalaqy tólemegen.