Aldaǵy bes jylda aýyldarda 79 myń shaqyrym elektr jelisi jańǵyrtylmaq
ASTANA. KAZINFORM — Energetıka vıtse-mınıstri Suńǵat Esimhanov mınıstrlik tarapynan aýyldyq jerlerde iske asyrylyp jatqan negizgi ınfraqurylymdyq jobalar týraly aıtty. Ol muny Astanada aýyldyq okrýgterdiń ákimderi úshin uıymdastyrylǵan jıynda aıtty. Bul týraly vedomstvonyń baspasóz qyzmeti málim etti.
Astanada aýyldyq okrýgterdiń ákimderi úshin uıymdastyrylǵan Dıalog platformasy aıasynda «Tabıǵı resýrstardy utymdy paıdalaný kontekstinde aýyl sharýashylyǵyn damytý» taqyrybyndaǵy paneldik sessııa ótti.
Plenarlyq bólimde spıkerler aýyldyq aýmaqtardyń turaqtylyǵyna, sý resýrstaryn tıimdi basqarýǵa, ekologııalyq tepe-teńdikti saqtaýǵa, sondaı-aq energetıkalyq jáne kólik ınfraqurylymyn jańǵyrtýǵa qatysty negizgi damý basymdyqtaryn atap ótti.
Energetıka vıtse-mınıstri Suńǵat Esimhanov mınıstrlik tarapynan aýyldyq jerlerde iske asyrylyp jatqan negizgi ınfraqurylymdyq jobalarǵa toqtaldy. Ol Energetıka jáne kommýnaldyq sektorlardy jańǵyrtý jónindegi Ulttyq joba aıasynda aýyldarda elektr jelilerin aýqymdy túrde jańartý josparlanǵanyn aıtty.
— Aldaǵy bes jylda 79 myń shaqyrym elektr jelisi jańǵyrtylyp, osy maqsatqa 2 trln teńge baǵyttalady. Bul jumys elektr jelileriniń tozý deńgeıin 74%-dan 45%-ǵa deıin tómendetýge múmkindik beredi, — dedi vıtse-mınıstr.
Sonymen qatar vıtse-mınıstr óńirlerdi gazdandyrý barysy, aýyl sharýashylyǵy taýaryn óndirýshilerdi jeńildetilgen dızel otynymen qamtamasyz etý, sondaı-aq jańartylatyn energııa kózderinen elektr energııasyn óndiretin netto-tutynýshylar úshin usynylatyn múmkindikter týraly keńinen baıandady.
Baǵdarlamanyń negizgi bóligi «suraq-jaýap» formatynda ótti. Aýyldyq okrýg ákimderi ortalyq memlekettik organdardyń ókilderi men sarapshylarǵa óz suraqtaryn tikeleı qoıyp, naqty máselelerge jaýap aldy. Talqylaý qorytyndysy boıynsha aldaǵy jumystyń naqty baǵyttary aıqyndalyp, aýyl ákimderi kótergen ózekti máselelerdi jan-jaqty pysyqtaýǵa qatysty usynystar jasaldy.
Aıta keteıik, Qazaqstanda 2050 jylǵa qaraı jańartylatyn energııa kózderiniń úlesi 50%-ǵa jetedi.