Aldaǵy aılarda Palestınany memleket retinde moıyndaýymyz ábden múmkin – Makron

ASTANA. KAZINFORM – Frantsııa prezıdenti Emmanýel Makron Frantsııa aldaǵy aılarda Palestınany táýelsiz memleket retinde moıyndaýy múmkin ekenin aıtty, dep jazady Anadoly.

Bul sheshim maýsym aıynda Saýd Arabııasymen birlesip ótkiziletin halyqaralyq konferentsııa aıasynda qabyldanýy yqtımal. Konferentsııada Izraıl men Palestına arasyndaǵy «janjaldy» sheshýdiń «eki memleket» qaǵıdasy talqylanady, al Makron osy jıynnyń tóraǵasy bolady.

Makron Palestınany moıyndaý máselesin Mysyrǵa jasaǵan eki kúndik saparynan keıin France 5 telearnasyna bergen suhbatynda aıtty. 

– Biz Palestınany moıyndaý jolynda alǵa jyljýymyz kerek. Bul qadamdy aldaǵy aılarda júzege asyrýymyz ábden múmkin, - dedi Frantsııa prezıdenti. 

Ol maýsym aıynda Saýd Arabııasymen birge ótkizetin eki memleket sheshimine arnalǵan halyqaralyq konferentsııada Palestınany memleket retinde moıyndaý máselesi túbegeıli sheshilýi múmkin ekenin málimdedi. 

6-7 sáýir kúnderi Mysyrǵa jasaǵan resmı sapary kezinde Emmanýel Makron Palestına men Izraıl arasyndaǵy eki memleket sheshimin qarastyratyn halyqaralyq konferentsııa uıymdastyratynyn, onyń teńtóraǵasy Saýd Arabııasy bolatynyn jarııalady. 

2023 jyldyń 7 qazanynan bastap Izraıl Gazada áskerı shabýyldaryn bastaǵaly beri Frantsııadaǵy oppozıtsııa Palestınany shuǵyl túrde memleket retinde moıyndaýǵa shaqyrýlaryn kúsheıtti. 

Aıta keteıik, Indonezııa prezıdenti Prabovo Sýbıanto jaralanǵandardy qosqanda 1 000-ǵa jýyq palestınalyqty ýaqytsha qabyldaýǵa daıyn ekenin málimdedi.