Aldaǵy 5 jylda 1 mıllıon adam jasandy ıntellekt daǵdylaryn meńgeredi - Mádıev

ASTANA.  KAZINFORM  -  Aldaǵy 5 jylda 1 mıllıon adam jasandy ıntellekt daǵdylaryna úırenedi.  Bul týraly Májiliste ótip jatqan parlamenttik tyńdalymda Tsıfrlyq damý, ınnovatsııalar jáne aeroǵarysh ónerkásibi mınıstriniń mindetin atqarýshy Jaslan Mádıev aıtty.

- Bıyl Ulttyq jasandy ıntellekt platformasy iske qosyldy. Ol arqyly qurylymdalǵan derekter bazasyna, esepteý qýattaryna jáne úlken tildik modelderge qoljetimdilik bolady. Platforma baǵdarlamalaý daǵdylarynsyz jasandy ıntellekt agentterin ázirleýge múmkindik beredi. Aldymyzda 5 jyl ishinde 1 mıllıon adamdy jasandy ıntellekt daǵdylaryna úıretý maqsaty tur, - dedi ol.

Onyń, atap ótýinshe, bilim berý bastamalary mektep oqýshylaryn, stýdentterdi, memlekettik qyzmetshilerdi, bıznesti jáne barlyq qalaýshylardy qamtıdy.

- Adam kapıtalyn jáne ınnovatsııalyq kásipkerlikti damytý úshin Qazaqstanda turaqty startap-ekojúıe qalyptasyp keledi. Astana Hub-ta jyldyq tabysy 1,5 mlrd AQSh dollaryn quraıtyn 1 700-den astam qatysýshy bar. Bul kórsetkish 5 jyl ishinde 40 esege ósti. Búginde Astana Hub elimizdiń 20 óńirinde jumys isteıdi, - dep atap ótti Jaslan Mádıev.

Aıta keteıik, tyńdalym barysynda Májilis tóraǵasy Erlan Qoshanov zańnamany JI-tehnologııalardyń damýyna beıimdemeýdiń saldary týraly paıymyn bildirdi.