Aldaǵy 4 jyl tájirıbe jınaýǵa jetedi — Ábıba Ábýjaqynova

ALMATY. KAZINFORM — Parıj Olımpıadasynan elge oralǵan dzıýdodan Qazaqstan quramasynyń múshesi Ábıba Ábýjaqynova jarystan keıingi áserimen bólisti.

«Ystyq yqylaspen kútip alǵandaryńyzǵa raqmet. Osy joly 5-orynmen qaıttym. Aldaǵy jarystarda kók týymyzdy bıikten jelbiretýge ýáde beremin. Meniń jaqsy kúresip kele jatqanyma 2 jyl ǵana boldy. Qalǵan qarsylastarym burynnan júldeger bolyp júrgen qyzdar. Taǵy da 4 jyl maǵan tájirıbe jınaýǵa jetedi dep oılaımyn. 48 kelide qalamyn», - dedi sportshy.

Qazaqstandyq dzıýdoshy el namysyn osy jyldyń qazan aıynda Abý-Dabıde qorǵamaq.

«Qazannyń 13 kúni Ábý-Dabıde ótetin Grand Slam týrnırinde kúresemin. Oǵan 2 aı bar. Buıyrsa 2 aptadaı demalyp, qaıtadan jattyǵýǵa oralamyn. Biraq Olımpıada kezinde shaǵyn jaraqatym boldy», - deıdi ol.

Sondaı-aq dzıýdoshy qyz jeke ómirine baılanysty suraqtarǵa da jaýap berdi.

«Kelesi Olımpıadaǵa deıin turmys qurý maǵan kedergi emes. Turmysqa shyqpaımyn dep ashýlanyp aıttym. Bul týraly áli oılanyp kóremin», - dedi Ábıba Ábýjaqynova.

Eske salaıyq, otandasymyz qola medal úshin talasta shvetsııalyq jas balýan Tara Babýlfattan utylyp qalǵan bolatyn. 

Ábýjaqynova jubanysh beldesýinde Paragvaı dzıýdoshysy Gabrıela Narvaesti utyp, qola medalǵa talasý múmkindigine ıe bolaǵan edi. 

Sondaı-aq, Ábıba Ábýjaqynova birinshi beldesýinde Izraıl balýany Sara Rıshonıdi Waza-Ari upaıymen jeńse, ekinshi kezeńde Taıpeı sportshysy Chen-Hao Lınniń jaýyrynyn 17 sekýndta jer ıisketti.

Ókinishke qaraı, otandasymyz Olımpıada oıyndarynyń úshinshi aınalymynda qarsylasyna jol bergen bolatyn.