Aldaǵy 4-5 jylda sý sharýashylyǵy salasyna 2 myńdaı maman qajet
ASTANA. KAZINFORM — Qazaqstanda sý sharýashylyǵy salasyn kadrmen qamtý is-sharasy qaı deńgeıde júrip jatyr? Bul saýalǵa Sý resýrstary jáne ırrıgatsııa mınıstrligi ǵylym jáne ınnovatsııalar departamentiniń dırektory Lázzat Júsipova jaýap berdi.
— Búginde mınıstrlikke vedomstvolyq baǵynysty mekemelerde, ıaǵnı sý qoımalary, gıdrotehnıkalyq qurylysjaı jáne basseındik ınspektsııa kásiporyndarynda 10 000-ǵa jýyq maman jumys isteıdi. Jańa qurylys nysandarynyń salynýyna baılanysty jáne sý sharýashylyǵy salasy jumysshylarynyń jas ereksheligine júrgizilgen taldaý nátıjesinde aldaǵy 4-5 jylda salaǵa 2000-daı maman qajet dep boljanyp otyr. Osyǵan baılanysty, mınıstrlik tarapynan sý salasyna bilimdi kadrmen qamtamasyz etý, sonymen qatar sý sharýashylyǵy qyzmetkerleriniń biliktiligin arttyrý men qaıta daıarlaý máselesi kún tártibinde tur, — dedi Lázzat Júsipova ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, Eýropalyq qaıta qurý jáne damý banki qarjylandyratyn sý sharýashylyǵy nysandaryn rekonstrýktsııalaý jobalary aıasynda 120 turaqty jumys ornyn qurý jospary bar.
— Islam damý bankiniń qoldanystaǵy jáne jańa nesıesi aıasynda 260 turaqty jumys orny ashylady. Halyqaralyq qaıta qurý jáne damý banki qarjylandyratyn «Sýarý jáne drenaj júıelerin jetildirý, 2-faza» jobasy aıasynda 270 turaqty jumys orny ashylady. Respýblıkalyq bıýdjetten bólingen nysanaly transfert esebinen Túrkistan oblysyndaǵy «Báıdibek ata» sý qoımasyn salý jobasy aıasynda 70, al «Qaraqýys» sý qoımasyn salý jobasy aıasynda 12 turaqty jumys ornymen qamtylady. Odan bólek, Túrkistan oblysyndaǵy Ýgam ózeninde kaskadty gıdroelektrostansasy sý qubyryn salý jobasy aıasynda keminde 660 jumys ornyn (500 ýaqytsha, 160 turaqty) qurý josparlanyp otyr. Bul óńirdiń áleýmettik-ekonomıkalyq damýyna oń áser etedi, — deıdi mınıstrlik ókili.
Aıta keteıik, mınıstrliktiń málimetinshe, aýylda jumys isteıtin sý salasy mamandaryna 7,8 mln teńgege deıin járdemaqy beriledi.
Sondaı-aq brıfıng barysynda nelikten Qazaqstan kórshi eldermen sý máselesin sheshe almaı otyr degen másele kóterildi.