Aldaǵy 3 jylda Ulttyq qorǵa qansha túsim túsedi – Jumanǵarın boljamy
ASTANA. KAZINFORM – 2029 jyly Ulttyq qordyń valıýtalyq aktıvteri 70,6 mlrd dollarǵa ósedi. Bul týraly Úkimet otyrysynda 2027-2029 jyldarǵa arnalǵan áleýmettik-ekonomıkalyq damý boljamdaryn jarııalanǵan Premer-mınıstrdiń orynbasary – Ulttyq ekonomıka mınıstri Serik Jumanǵarın málim etti.
- Memlekettik qarjynyń turaqtylyǵyn qamtamasyz etý maqsatynda bıýdjet tapshylyǵy 2027 jyly jalpy ishki ónimge qatysty 2,3 paıyz deńgeıinde belgilenip, 2029 jyly jalpy ishki ónimge qatysty 0,4 paıyzǵa deıin tómendeıdi. Munaıdan tys tapshylyq jalpy ishki ónimge qatysty 5,3 paıyzdan jalpy ishki ónimge qatysty 2,5 paıyzǵa deıin qysqarady. Osyny eskere otyryp, respýblıkalyq bıýdjettiń shyǵystary 2027 jyly - 30,2 trln teńgeni, 2028 jyly – 29,4 trln teńgeni jáne 2029 jyly 29,6 trln teńgeni quraıdy, - dedi Serik Jumanǵarın.
Vıtse-premerdiń paıymynsha, Ulttyq qordaǵy jınaqtardyń ulǵaıýy boljanyp otyr.
- Bazalyq stsenarıı kezinde Ulttyq qorǵa túsimderdiń jalpy kólemi 2027 jyly - 5,1 trln teńge, 2028 jyly – 5,5 trln teńge jáne 2029 jyly 5,7 trln teńge deńgeıinde boljanady. Ulttyq qorǵa taza túsimder 2027 jyly 0,5 trln teńge, 2028 jyly 1,4 trln teńge jáne 2029 jyly 2,0 trln teńge mólsherinde kútiledi. Ulttyq qordyń valıýtalyq aktıvteri 2027 jyly 65,2 mlrd AQSh dollarynan 2029 jyly 70,6 mlrd AQSh dollaryna deıin ósedi dep boljanady, - dedi vıtse-premer.
Aıta keteıik, Úkimet otyrysynda 2027-2029 jyldarǵa arnalǵan áleýmettik-ekonomıkalyq damý boljamdary men «2027-2029 jyldarǵa arnalǵan respýblıkalyq bıýdet týraly» zań jobasy, sonymen qatar aldaǵy jylytý maýsymyna daıyndyq barysy talqyǵa salynady.
