Aldaǵy 3 jylda metro «Barlyq» bazaryna deıin jetedi — Almaty ákimi
ALMATY. KAZINFORM — Almaty qalasynyń ákimi Darhan Satybaldy kólik ınfraqurylymyn damytýǵa baǵyttalǵan jobalardyń qalaı iske asyrylyp jatqanyn túsindirdi.
Almaty ákimniń aıtýynsha, bıyl Seıfýllın dańǵyly men Jansúgirov kóshesiniń qıylysyndaǵy jolaıyryq paıdalanýǵa berildi. Sondaı-aq Abaı dańǵyly uzartylyp, qozǵalys ashyldy jáne 35 shaqyrym jańa avtomobıl joly salyndy. Jalpy 281 shaqyrym jolǵa ortasha jóndeý júrgizildi.
Sondaı-aq Darhan Satybaldy qaladaǵy metropolıtendi damytý josparyna toqtaldy.
— Qalanyń zamanaýı kólik júıesin qalyptastyrý — Almatynyń negizgi basymdyqtarynyń biri. Osyǵan baılanysty Almaty oblysy aýmaǵynda radıaldy joldardy uzartý jáne jolaıyryqtaryn salý týraly sheshim qabyldandy. Bul jobalar Almaty qalasynyń bıýdjeti esebinen júzege asyrylady. Sonyń nátıjesinde Úlken Almaty aınalma avtomobıl jolymenkólik baılanysy jedel ári aglomeratsııanyń ózara baılanysy kúsheıedi. Sondaı-aq 2026 jyly «Qalqaman» metro beketin paıdalanýǵa berý josparlanyp otyr. Aldaǵy úsh jyl ishinde birinshi jeli «Barlyq» bazaryna deıin jetkiziledi. Qazirgi tańda metronyń ekinshi jáne úshinshi jelileri jobalanyp jatyr, — dedi Darhan Satybaldy.
Eske salaıyq, Almaty metrosynda 14 jylda 200 mln jolaýshy tasymaldanǵan.