Aldaǵy 3 jylda aýyl sharýashylyǵy ekonomıka ósiminiń draıverine aınalady

- Sizderdiń qaraýlaryńyzǵa 2027 – 2029 jyldarǵa arnalǵan áleýmettik-ekonomıkalyq damý boljamynyń jobasy engiziledi. Boljam álemdik ekonomıka jáne syrtqy naryqtardaǵy konıýnktýra boıynsha boljamdardy eskere otyryp qalyptastyryldy. Syrtqy syn-qaterlerdiń saqtalýyna qaramastan, Qazaqstan ekonomıkasy ósýin jalǵastyryp keledi. Bazalyq nusqaǵa sáıkes 2027-2029 jyldary jalpy ishki ónimniń naqty ortasha jyldyq ósýi 5 paıyzdan joǵary deńgeıde boljanady. Nomınaldy jalpy ishki ónim 2027 jyly 199,3 trln teńgeden 2029 jyly 245 trln teńgege deıin ósedi, - dedi Serik Jumanǵarın.

Vıtse-premer málimetinshe, ekonomıkanyń ósýi munaıdan tys sektorlardaǵy óndiristiń ulǵaıýymen qamtamasyz etiledi. Óńdeý ónerkásibiniń ósý qarqyny taý-ken ónerkásibiniń ósý qarqynynan joǵary bolady. Óńdeý ónerkásibiniń ósýine metallýrgııa, mashına jasaý, qurylys materıaldaryn óndirý, hımııa ónerkásibi, tamaq ónimderin óndirý negizgi úles qosady.

- Ekonomıkanyń ósý draıverleriniń biri aýyl sharýashylyǵy bolady. Onyń jyl saıynǵy ortasha ósýi keminde 5 paıyzdy quraıdy. Qurylysta ósý qarqynynyń 2027 jyly 16 paıyzdan 2029 jyly 17,3 paıyzǵa deıin artýy boljanady, - dedi ol.

Onyń atap ótýinshe, buǵan kóliktik-logıstıkalyq, energetıkalyq jáne sý ınfraqurylymyn odan ári damytý jónindegi jobalardy josparly iske asyrý, sondaı-aq turǵyn úı-kommýnaldyq jáne áleýmettik-ınfraqurylymdy jańǵyrtý yqpal etedi.

- Qyzmet kórsetý salasynda da turaqty serpin saqtalady. Saýda orta eseppen jylyna 5,7 paıyzǵa, kólik jáne qoımalaý 10,4 paıyzǵa, aqparat jáne baılanys 9,2 paıyzǵa ósedi. Oń saýda balansy saqtalady, - dedi vıtse-premer.

Aıta keteıik, Úkimet otyrysynda 2027-2029 jyldarǵa arnalǵan áleýmettik-ekonomıkalyq damý boljamdary men «2027-2029 jyldarǵa arnalǵan respýblıkalyq bıýdet týraly» zań jobasy, sonymen qatar aldaǵy jylytý maýsymyna daıyndyq barysy talqyǵa salynady.