Alda tartysty oıyndar kútip tur - Starygın
ASTANA. QazAqparat - Hokkeıden Qazaqstan stýdentter quramasynyń bas jattyqtyrýshysy Qytaımen ótken oıynnan keıingi baspasóz máslıhatynda komandasyn alda tartysty oıyndar kútip turǵanyn aıtty, dep jazady kaz.vesti.kz.
Hokkeıden Qazaqstan stýdentter quramasynyń bas jattyqtyrýshysy Qytaımen ótken oıynnan keıingi baspasóz máslıhatynda komandasyn alda tartysty oıyndar kútip turǵanyn aıtty. Tilshilerdiń suraqtaryna jaýap berip, shákirtterine kóńili tolatynyn tilge tıek etti.
- Ýnıversıada endi ǵana bastaldy. Daıyndyǵymyzdy baıqattyq. Qarsylastar álsiz shyqty. Oıyn tamasha nátıjemen aıaqtaldy. Jigitter jarady. Qazaqstandyqtar men shákirtterimdi jarqyn jeńisimen quttyqtaımyn.
Búgin Shvetsııa men AQSh arasyndaǵy joldastyq oıyndy kórdim. Reseı, Slovakııa jáne Kanada hokkeıshileri de qaýqarly. Alda tartysty oıyndar kútip tur, - dedi bas jattyqtyrýshy.
Oıyn sońynan Qytaı hokkeıshilerin bastap kelgen jattyqtyrýshy Vang Benıý da óz oıyn bildirdi.
- Sizderdiń komandalaryńyz óte myqty. Keleshekte sizderden sabaq alyp oınaıtyn bolamyz. Deńgeıi joǵary. Jeńisterińizben quttyqtaımyn. Bizdiń qurama 3 ýnıversıtettiń stýdentterinen jasaqtaldy. Komandada 17 ǵana hokkeıshi bar. Ekeýi jaraqat alyp qaldy. Kelesi oıynǵa tyńǵylyqty daıyndalamyz, - dedi.
Aıta keteıik, «Halyq Arenada» ótken oıynda Qazaqstan stýdentter quramasy Qytaıdy 22:0 esebimen utty. Otandastarymyz kelesi oıynyn 31 qańtar kúni Shvetsııaǵa qarsy ótkizedi.
