Alda kúndiz-túni talmaı atqaratyn asa qaýyrt jumys kútip tur - Ómirzaq Shókeev
«Nur Otan» partııasynyń bastamalary óte durys ári der kezinde qolǵa alyndy degen oıdamyn. Onyń kópshiligi áleýmettik salaǵa baǵyttalyp otyr. Birinshiden, áleýmettik salada eńbek etetin, jalaqysy tómen bıýdjet qyzmetkerleriniń aılyǵyn ósirý - barlyǵy da kútip otyrǵan ózekti sharýa. Odan keıin kópbalaly otbasylar úshin ár balaǵa 21 myń teńgeden járdemaqy tóleý - úlken kómek. Ataýly áleýmettik kómektiń mehanızmin jetildirý máselesi de óte ózekti», - deıdi Ómirzaq Shókeev.
Túrkistan oblysynyń ákimi kópbalaly otbasylardy qoldaý baǵytyndaǵy jumystardy atqarý úshin adamı faktordy ysyryp tastap, barlyǵyn da tsıfrlyq júıe arqyly júzege asyrý kerektigin erekshe atap ótti.
«Ár bala dúnıege keldi me, ol birden tizimge enýi kerek. Qaǵaz jınap, ár esikke júgirýden arylǵan abzal. Biraq, arasynda tehnıkalyq sebeptermen tizimge enbeı qalǵandar bolsa, olarmen komıssııa jumys júrgizýi kerek. Búgin ózińiz kórgendeı bárine aýqymdy tapsyrma berildi ǵoı. Endi baryp elmen aqyldasamyz. Óıtkeni, bul baǵytta buryn-sońdy bolmaǵan qarajat bólinip jatyr», - deıdi ol.
Ómirzaq Shókeev búgingi sezd barysynda asa qomaqty somalar týraly aıtylǵanyn taǵy eske saldy.
«Túrkistan oblysy - halqy kóp óńirlerdiń biri bolǵandyqtan, osy somanyń belgili bir bóligi mindetti túrde bizge bóliner degen oıdamyn. Biz mınıstrliktermen tıisti jumysty atqaratyn bolamyz. Bıýdjet kúzde qabyldanatyny belgili. 20 kúnnen keıin bul baǵytta óz usynystarymyzdy alyp kelemiz. Bizdi endi kúndiz-túni atqaratyn qaýyrt jumys kútip tur», - deıdi Túrkistan oblysynyń ákimi.
Aıta ketsek, búgin elordadaǵy Táýelsizdik saraıynda Elbasy Nursultan Nazarbaevtyń tóraǵalyǵymen «Nur Otan» partııasynyń kezekti XVIII sezi ótti. Jıynda Memleket basshysy halyqty qoldaýǵa arnalǵan birshama áleýmettik bastamalar týraly sóz qozǵaǵan bolatyn.
