Alda bolatyn Parlament saılaýynan biz de tysqary qalmaımyz - J.Ahmetbekov
ALMATY. 31 naýryz. QazAqparat /Ádilet Musahaev/ - Prezıdenttik saılaý ótkennen keıin qazirgi úkimettiń quramy jańaratyny belgili. Parlamentshiler qatary jańa qurammen tolyǵady.
Osy jaıttan biz de tysqary qalmaı, sol Parlamentke mandat alýǵa umtylatyn bolamyz. Bul jaıynda búgin QR Prezıdentiginen úmitker Jambyl Ahmetbekov Almatydaǵy Saryarqy alańynda ótkizgen mıtıng barysynda aıtty.
Onyń aıtýynsha, Parlamentte elimizdiń ár partııasynyń múshesi jumys istep, ózindik únderin qosýy kerek. "Negizinen úkimette ár partııanyń kem degende 5 múshesi jumys atqarýy kerek.",-deıdi J.Ahmetbekov.
Sonymen qatar ol óz baǵdarlamasynda kedeıshilikpen, jumyssyzdyqpen jáne qymbatshylyqpen kúres sııaqty úsh qaǵıdany alǵa tartatyndyǵyn atap ótti. «Biz kóp partııaly úkimet qurýdy qoldaımyz jáne soǵan jetý úshin jumystar atqaratyn bolamyz. Biz órkenıetti elder qataryndamyz, olaı bolsa bizdiń kún-kóris, tabysymyz da soǵan saı bolýy kerek», -deıdi ol.
