Alda aýqymdy jumys kútip tur - QHA Tóraǵasynyń jańa orynbasary
«Men úshin QHA Tóraǵasynyń orynbasary bolyp taǵaıyndalý kútpegen jańalyq boldy. Bul – úlken jaýapkershilik. Elbasynyń maǵan degen úlken senimin aqtaýǵa tyrysamyn»,– dedi Zakırjan Kýzıev.
Sonymen qatar, ol aldaǵy jumys josparymen bólisti.
«Biz osy jyldy abyroımen aıaqtap, barlyq múmkindikterimizdi kórsetemiz dep oılaımyn. Biz jyl sońyna deıin orasan zor jumys atqarýdy josparlap otyrmyz. Qazir is-sharalar josparyn daıyndap jatyrmyz. Birinshi kezekte jastarǵa nazar aýdaramyz. Munda jastarǵa qatysty kóptegen baǵdarlamalar bar. Etnomádenı ortalyqtardyń tóraǵalarymen kezdesemiz. Jalpy, aldaǵy kúnderge jáne kelesi jylǵa jumys josparyn ázirlep jatyrmyz», - dedi ol.
Zakırjan Kýzıev Qazaqstan halqy Assambleıasy Tóraǵasynyń orynbasarlyǵyna taǵaıyndalǵanǵa deıin «Qazaqstan uıǵyrlarynyń respýblıkalyq mádenı ortalyǵy» Almaty oblysyndaǵy fılıalynyń tóraǵasy boldy.
«Bıyl biz aýqymdy jumys atqardyq. Pandemııaǵa qaramastan, Qazaqstannyń uıǵyr etnomádenı ortalyǵy 120 mln teńgege túrli qaıyrymdylyq shara ótkizdi. Bul uıǵyr etnomádenı ortalyǵy arqyly, al Assambleıa boıynsha 1,5 mlrd teńgege jasadyq. Barlyq kásipkerler múmkindiginshe kómek qolyn sozyp jatyr. Eger Almaty oblysy týraly aıtar bolam, ortalyq «Biz birgemiz» baǵdarlamasyna shamamen 42 mln teńge bóldi», - dep qosty ol.
Zakırjan Kýzıev Elbasy Nursultan Nazarbaevtyń Qazaqstan halqy Assambleıasy keńesiniń otyrysynda kótergen máselelerge de toqtaldy.
«Keshegi ótken keleli keńeste ózekti máseleler kóterildi. Basty taqyryptardyń biri – qazaq tiline kóshý boldy. Shynynda da, bul olqylyqtyń ornyn toltyrý qajet. Birinshi synyptan bastap qazaq tilinde qazaq tarıhyn oqytý týraly usynys jasaldy»,– dep atap ótti ol.
Onyń aıtýynsha, búginde Qazaqstanda 570 myńǵa jýyq uıǵyr turady, onyń 500 myńy Almaty oblysynda.
