Alda áleýmettik bastamalardy ilgeriletý mindeti tur - Latıfsha Asanov
Latıfsha Asanovtyń pikirinshe, Qazaqstan halqy Assambleıasynyń tóraǵasy Nursultan Nazarbaevtyń qatysýymen ótetin alqaly basqosýda elimizdegi áleýmettik-saıası, mádenı-rýhanı salalaryna qatysty mańyzdy mindetter qolǵa alynatyn bolady.
«Baıandy bastamalar turaqtylyq pen kelisimniń budan ári nyǵaıýyna, elimizdiń jan-jaqty damýyna óz septigin tıgizip keledi. Bıyl 1 mamyr - Qazaqstan halqynyń birligi kúni qarsańyndaǵy «Beıbitshilik pen kelisim formýlasy: áleýmettik birlik jáne jańǵyrtý» taqyrybynda ótetin sessııada Assambleıa músheleri aldynda birlik pen kelisimdi nyǵaıtý, áleýmettik baǵyttaǵy jumystardy jandandyrý jumystaryna erekshe nazar aýdarylady degen oıdamyz. Óıtkeni, álemde júrip jatqan úderisterge kóz salar bolsaq, daǵdarys qarjylyq, ekonomıkalyq salalarmen ǵana shektelmeı, áleýmettik, etnosaralyq jáne dinaralyq máselelerdiń ýshyǵýyna sebepker bolýy múmkin»,- deıdi Latıfsha Asanov.
Túrik etnomádenı birlestiginiń tóraǵasy sondaı-aq, basqosýda elimizde daǵdarysqa qarsy keshendi sharalar qolǵa alynatyny sóz bolady dep otyr. Mundaı sharalar tek qana ekonomıka jáne áleýmettik salalarmen qatar, ıdeologııalyq baǵytta da kidirissiz jumys isteýde.
«Aldymyzda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy, «Prezıdenttiń bes áleýmettik bastamasy» atty halyqqa Úndeýi jáne «Uly dalanyń jeti qyry» baǵdarlamalyq maqalasy aıasyndaǵy bastamalardy ilgeriletý mindetteri tur. Osyǵan baılanysty, Qazaqstan halqy Assambleıasynyń qaıyrymdylyq salasynda aýqymdy jumys júrgizip keledi. Ótken jyldyń ІV toqsanynda Shymkent qalalyq Qazaqstan halqy Assambleıasynyń bastamasymen qala aýmaǵynda 19 qaıyrymdylyq is-sharasy uıymdastyrylyp, 122 azamatqa 1,8 mln teńgeniń kómegi kórsetildi»,- deıdi Latıfsha Asanov.
Aıta keteıik, bıyl QHA-nyń «Qaıyrymdylyq kerýeni» aktsııasy aıasynda aı saıyn «Sarqyt», «Sybaǵa», «Shashý», «Asar» syndy aıdarlarmen qaıyrymdylyq is-sharalary ótkizilip, qala aýmaǵyndaǵy kómekke muqtaj 100-den astam azamatqa 2 mln teńge somasynda kómekter úlestirilgen. Etnomádenı birlestikterdiń kóp balaly analarǵa syı-qurmet kórsetý, balalar úılerindegi qaıyrymdylyq baǵyttaǵy túrli sharalary turaqty jalǵasyp keledi.
«Memlekette qoǵamdyq-saıası turaqtylyq bolmaı, ekonomıkalyq salada jetistik bolmaıtyny málim. Sondyqtan, halqymyzdyń birligin budan ári nyǵaıtý mindeti tur. Qashanda elimizdegi mańyzdy bastamalardy iske asyrýda aldyńǵy qatarda júrgen assambleıa músheleri aldaǵy ýaqytta da bir shańyraq astynda bir úıdiń balasyndaı belsendilik tanytatyn bolamyz»,- deıdi Latıfsha Asanov.
