«Albı» lombardtar jelisi zańsyz qyzmetten 146 mln teńgeden astam tabys tapqan
ASTANA. KAZINFORM- Qarjylyq monıtorıng agenttiginiń Almaty oblysy boıynsha departamenti «Albı» lombardtar jelisiniń zańsyz qyzmetin toqtatty. Tergeý málimetinshe, zańsyz qyzmetten túsken tabys 146 mln teńgeden asqan.
Qarjylyq monıtorıng agenttiginiń baspasóz qyzmetiniń málimetterinshe, sottyń ruqsatymen kúdiktiniń 21 páterine, 5 jer telimine, 7 avtokóligine, 7 garajyna, 2 dúkeni men qonaqúıine tyıym salyndy.
Tergeý málimetinshe, buǵan deıin «Albı-Lombard» JShS mıkroqarjylyq qyzmetpen aınalysatyn uıymdardyń tiziliminen shyǵarylyp, lombard qyzmetin júrgizý quqyǵynan aıyrylǵan. Alaıda kompanııa ataýyn «Albı-KM» JShS dep ózgertkennen keıin Almaty jáne Túrkistan oblystarynda zergerlik buıymdardy kepilge alyp, qaryz bere bergen.
Lombardtar negizinen bazarlar men saýda úıleriniń mańynda ornalasqan. Klıentterdi tartý úshin kepilge qoıylǵan múliktiń joǵary baǵalanatynyn jáne qaryz alýdyń nesıe tarıhyna áser etpeıtinin aıtyp, jarnama taratqan.
Qaryzdar kúnine 2 paıyzdyq ósimmen berilgen. Bul zańda belgilengen 0,3 paıyzdyq shekti mólsherlemeden alty ese joǵary. Qaryz sharttary burynǵy «Albı-Lombard» JShS-niń mórleri basylǵan kepil bıletteri arqyly rásimdelgen. Aqshalaı esep aıyrysý qolma-qol jáne kúdiktilerdiń baqylaýyndaǵy jeke kásipkerlerdiń bank shottary arqyly júrgizilgen.
Kúdikti áıelge qatysty eshqaıda ketpeý jáne tıisti minez-qulyq týraly qolhat alý túrindegi bultartpaý sharasy qoldanyldy.
Qylmystyq is sotqa joldandy. Ózge málimetter Qazaqstan Respýblıkasy Qylmystyq-protsestik kodeksiniń 201-babyna sáıkes jarııa etilmeıdi.
Osyǵan deın Astanada zańsyz oıyn bıznesin uıymdastyrýshylardan 124,8 mln teńgeden astam qarjy óndirilgeni týraly jazdyq.
