Alberta provıntsııasy Kanadanyń quramynda qala bermek
ASTANA. KAZINFORM — Kanadanyń Alberta provıntsııasynda referendým ótti. Mıllıonnan asa bıýlleten sanalǵan aldyn ala nátıjeler boıynsha provıntsııa turǵyndarynyń shamamen 76%-y Kanadadan táýelsizdik alyp shyǵýǵa qarsy daýys bergen. CBC News provıntsııalyq separatıster jeńiliske ushyrady dep boljap otyr, dep habarlaıdy BBC.
Referendýmda Albertanyń Kanadadan bólinýi qajet pe degen suraq emes, osy jaıly referendým ótkizý qajet pe degen suraq qoıylǵan.
Elections Alberta saıtynyń málimetine súıensek, saılaýshylardyń shamamen 76%-y «Alberta Kanadanyń provıntsııasy bolyp qalýy kerek» nusqasyn tańdaǵan. Alberta turǵyndarynyń shamamen 24%-y Kanadadan bóliný máselesin bastaý qajet dep daýys berdi.
— 19 qazanda Alberta turǵyndary aıqyn tańdaý jasady. Olar birlikti, birge bolashaq qurýdy jáne bir-birine qamqorlyq jasaýdy tańdady. Eń bastysy, olar Kanadany tańdady, — dedi premer-mınıstr Mark Karnı aldyn ala nátıjelerge qatysty pikir bildire otyryp.
Referendýmnyń tolyq nátıjeleri saılaý ýchaskeleri jabylǵannan keıin eki kúnnen keıin belgili bolady, al resmı qorytyndylar 29 qazanda jarııalanýǵa tıis.
Sebebi mıllıondaǵan bıýlleten qolmen sanalady.
Bul referendýmda ekzıt-poll júrgizilmeıdi, biraq Kanada BAQ-tary saılaý ýchaskeleri jabylǵannan keıin biraz ýaqyttan keıin alynǵan resmı derekterge súıene otyryp daýys berý nátıjeleri qalaı bolaryn boljap otyr.
Táýelsizdik máselesi munaı men gazǵa baı Alberta turǵyndary osy referendýmda oıyn beretin on suraqtyń biri. Qalǵandary negizinen jergilikti ózin-ózi basqarý ókilettikterine qatysty suraqtar. Referendým nátıjeleri zańdy túrde mindetti bolmaıdy.
Eske sala keteıik, Kanadaǵa qatysty AQSh prezıdenti Donald Tramp birazdan beri daýly pikirler aıtyp, onyń AQSh quramyna qosylatynyna tipti senim bildirgen.
Kanadanyń Alberta provıntsııasyndaǵy Ýeınraıt áskerı bazasynda bolǵan surapyl órtten tórt áskerı qyzmetshi qaza tapty.
