Albert Raý: Alataý — Qazaqstannyń jańa «jedel damıtyn qalasy»
ASTANA. KAZINFORM — QR Parlamenti Májilisiniń depýtaty Albert Raý jańa Konstıtýtsııadaǵy «jedel damıtyn qala» tujyrymdamasy men Alataý qalasynyń erekshe statýsyn túsindirdi.
— Qazirgi Konstıtýtsııada Astana halyqaralyq qarjy ortalyǵy úshin arnaıy quqyqtyq rejım qarastyrylǵan. Bul rejımniń basty ereksheligi — arnaıy sot júıesi men quqyqtyq standarttar. Jańa zań jobasy osy normany Alataý qalasyna da keńeıtýdi kózdeıdi, — dedi depýtat «Referendým-2026» onlaın marafonynda.
Ol Alataý qalasynyń statýsyn belgileýdiń múlde jańa bastama ekenin atap ótti.
— Qala ákimshiligi men Joǵarǵy keńes premer-mınıstrdiń basshylyǵymen halyqaralyq tájirıbege súıene otyryp jumys isteıtin bolady. Qalanyń ishki erejeleri halyqaralyq standarttar men úzdik praktıkalarǵa saı jasalady, — dedi Albert Raý.
Depýtat qalanyń ekonomıkalyq mańyzdylyǵyn da túsindirdi.
— Alataý tek jańa qala emes, bul ınvestıtsııalar men tehnologııalar ortalyǵy bolady. Onda erekshe valıýtalyq júıe, jańa tehnologııalar, qarjy qyzmetteri, krıptovalıýta, avtonomdy kólikterge arnalǵan arnaıy erejeler qarastyrylǵan. Ekologııalyq talaptar da ulttyq standarttardan tómen bolmaıdy, qoqys tek bólshektep jınalady, — dedi ol.
Sonymen qatar Albert Raý Alataý jobasynyń tarıhı mánin atap ótti.
— Bul qala Astananyń damý jolyn qaıtalaıdy. Biz Astanany jaqsy kóremiz, biraq elimizge batyl ári jańa jobalar qajet. Alataý Qazaqstannyń qazirgi jáne bolashaq kartasynda jańa juldyzǵa aınalýy múmkin, — dedi depýtat.
Aıta keteıik, Kazinform agenttiginiń YouTube arnasynda «Referendým-2026» onlaın-marafony tikeleı efırde kórsetilip jatyr.