Álibek Qýantyrov BUU Bas hatshysynyń orynbasarymen kezdesti
ASTANA. KAZINFORM — Qazaqstan men BUU-nyń Qorshaǵan orta jónindegi baǵdarlamasy plastık, Kaspıı teńizi jáne klımattyq kún tártibi máseleleri boıynsha yntymaqtastyqty nyǵaıtýǵa ýaǵdalasty. Bul týraly Ekologııa jáne tabıǵı resýrstar mınıstrligi habarlady.
Antalıa qalasynda ótip jatqan BUU-nyń Klımattyń ózgerýi týraly negizdemelik konventsııasy Taraptary konferentsııasynyń 31-sessııasy (COP31) aıasynda Qazaqstan Ekologııa jáne tabıǵı resýrstar mınıstri Á.Qýantyrovtyń Birikken Ulttar Uıymy Bas hatshysynyń orynbasary, BUU-nyń Qorshaǵan orta jónindegi baǵdarlamasynyń (ıÝNEP) Atqarýshy dırektory I.Andersenmen kezdesýi ótti.
Kezdesý barysynda taraptar Qazaqstan men ıÝNEP arasyndaǵy yntymaqtastyqtyń basym baǵyttaryn, sondaı-aq ózekti ekologııalyq jáne klımattyq máselelerdi sheshý jolyndaǵy áriptestikti odan ári nyǵaıtý perspektıvalaryn talqylady.
Plastıkpen lastanýǵa qarsy kúres jónindegi jahandyq kelisimdi ázirleýge baǵyttalǵan halyqaralyq kelissózder protsesine erekshe nazar aýdaryldy. Taraptar Úkimetaralyq kelissózder komıtetiniń jumysy barysy týraly pikir almasyp, tıimdi halyqaralyq sheshimderdi ázirleý úshin syndarly dıalogty jalǵastyrýdyń mańyzdylyǵyn atap ótti.
Talqylaýdyń jeke baǵyty Kaspıı teńiziniń ekojúıesin saqtaý máseleleri boıynsha yntymaqtastyqqa arnaldy. Mınıstr birlesken jumysty jandandyrý, múddeli memleketter men halyqaralyq uıymdardyń kúsh-jigerin biriktirý, sondaı-aq teńiz ortasyn qorǵaý jáne Kaspıı óńiriniń bıoalýantúrliligin saqtaý máseleleri boıynsha praktıkalyq ózara is-qımyldy damytý qajettigin atap ótti.
Taraptar metan shyǵaryndylaryn qysqartý máselelerin de talqylady. Qazaqstan metan shyǵaryndylaryn azaıtý jónindegi sharalardy iske asyrý tájirıbesimen bólisip, osy baǵyttaǵy halyqaralyq yntymaqtastyqty odan ári damytýdyń jáne ozyq tájirıbelermen almasýdyń mańyzdylyǵyn atap ótti.
Sonymen qatar Qazaqstannyń ıÝNEP-pen, onyń ishinde Jahandyq ekologııalyq qor (JEQ) jobalary aıasyndaǵy ózara is-qımylyn odan ári nyǵaıtýdyń mańyzy atalyp ótti. Taraptar maquldanǵan jobalardy ýaqytyly ári tıimdi iske asyrýdy qamtamasyz etý, sondaı-aq jańa birlesken bastamalardy ilgeriletý qajettigin atap ótti.
Qazaqstan plastıkpen lastanýǵa qarsy kúres jónindegi jahandyq kelisimdi ázirleýge arnalǵan beıresmı kezdesýge qatysqanyn jazǵan edik.