Álibek Ahmetov Aqtóbe oblystyq sotynyń tóraǵasy laýazymyna taǵaıyndaldy
ASTANA. KAZINFORM – Joǵarǵy Sot tóraǵasy Aslambek Merǵalıev Aqtóbe oblysy sottarynyń ujymyna Qazaqstan Respýblıkasy Prezıdentiniń Jarlyǵymen qyzmetke taǵaıyndalǵan oblystyq sottyń jańa tóraǵasy Álibek Ahmetovti tanystyrdy, dep habarlaıdy QR Joǵarǵy sotynyń baspasóz qyzmeti.
Álibek Ahmetovti taǵaıyndalýymen quttyqtaı otyryp, Joǵarǵy Sot Tóraǵasy onyń kásibı tájirıbesi men uıymdastyrýshylyq qasıetteri oblystyq sot jumysynyń tıimdiligin odan ári arttyrýǵa, sot praktıkasynyń birkelkiligin nyǵaıtýǵa jáne qoljetimdi jáne sapaly sot tóreligin qamtamasyz etý jónindegi mindetterdi iske asyrýǵa yqpal etetinine senim bildirdi.
Aslambek Merǵalıev zańnyń ústemdigi qaǵıdatyn múltiksiz saqtaý, sot sheshimderiniń ádildigin qamtamasyz etý, isterdi qaraýdyń aqylǵa qonymdy merzimderin saqtaý jáne azamattardyń sot júıesine degen senimin odan ári nyǵaıtý qajettigine erekshe nazar aýdardy.
Álibek Moldabekuly Ahmetov 1978 jyly Qyzylorda oblysynda dúnıege kelgen.
1999 jyly Qazaq memlekettik zań ýnıversıtetin bitirgen.
2000-2009 jyldary prokýratýra organdarynda jumys istedi.
2009-2016 jyldary – Tasqala aýdandyq sotynyń sýdıasy, odan keıin osy sottyń tóraǵasy, al 2016-2023 jyldary – Batys Qazaqstan oblystyq sotynyń sýdıasy,
2023 jyldan bastap qazirgi ýaqytqa deıin – Aqtóbe oblystyq sotynyń qylmystyq ister jónindegi sot alqasynyń tóraǵasy.
Osyǵan deıin Ǵalym Qulekeevtiń Qaraǵandy oblystyq sotynyń tóraǵasy bolyp taǵaıyndalǵany týraly jazdyq.
