Albanııanyń JI mınıstri parlamentte alǵash ret sóz sóıledi

ASTANA. KAZINFORM – Jasandy ıntellekt kómegimen qurylǵan Albanııa mınıstri beısenbi kúni parlamentte debıýt jasady, dep habarlaıdy Balkan Insight. 

Premer-mınıstr Edı Rama botty óz úkimetiniń ashyqtyq pen ınnovatsııaǵa umtylýynyń sımvoly retinde tanystyrdy. 

— Men munda adamdardy almastyrý úshin emes, olarǵa kómektesý úshin keldim. Iá, meniń azamattyǵym joq, mende jeke ambıtsııalar men múddeler de joq, — dep málimdedi bot parlamentke arnaǵan sózinde. 

Alaıda oppozıtsııalyq depýtattar JI uıymy tarıhı tórtinshi merzimge bılikke oralǵan Ramanyń nashar basqarýyn jasyrý úshin jasalǵan tútin ekrany bolǵanyn málimdep, ashýlandy.

— Shyndyq mynada — Edı Ramanyń «Dıellasy» — nasıhattyq qııal. Sybaılas jemqorlyq pen uıymdasqan qylmys — bul shyndyq. Dıella — bul kórinis emes, úkimet kúndelikti jasaıtyn orasan zor urlyqtardy jasyratyn vırtýaldy qasbet, — dep málimdedi oppozıtsııalyq Demokratııalyq partııanyń depýtaty Gazment Bardı.

Ótken aptada Albanııada memlekettik satyp alýlardy qadaǵalaıtyn jasandy ıntellekt-mınıstr qyzmetke kiristi. Ol Diella dep atalady (alban tilinde «kún» degen maǵynany bildiredi). https://kaz.inform.kz/news/alemde-tungish-zhasandi-intellekt-ministr-albaniyada-tagayindaldi-b6e7aa/

Jasandy ıntellekttiń avatarynda dástúrli alban kıimindegi jas qyz beınelengen.

Premer-mınıstr Edı Ramanyń aıtýynsha, Albanııa memlekettik tenderleri 100% sybaılas jemqorlyqtan arylǵan elge aınalady. Barlyq memlekettik qarajat ashyq ári tolyqtaı baqylaýda bolady.

Jasandy ıntellekt Diella alban halqyn jaqsy tanıdy. Ol qazirdiń ózinde ulttyq elektrondy memlekettik qyzmetter júıesi — e-Albania-ny basqaryp otyr.

Buǵan deıin Qytaı energetıka salasyna jasandy ıntellekt (JI) tehnologııalaryn engizýdi jedeldetý josparyn usynǵanyn jazǵan bolatynbyz.

Aıta keleıik, memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn júzege asyrý sheńberinde Energetıka mınıstrligi elektr jáne jylý jelileriniń jaı-kúıin dıagnostıkalaýǵa arnalǵan zamanaýı tehnologııalardy engizýdi josparlap otyr.