Albanııadaǵy jer silkinisi: 3 adam qaza taýyp, 100-den astamy zardap shekti
NUR-SULTAN. QazAqparat – Albanııada seısenbi kúni kúshi 6,4 baldyq jer silkinisiniń saldarynan úsh adam qaza taýyp, 100-den astamy zardap shekti. Bul týraly Reuters agenttigi habarlady.
Exit jańalyqtar portalynyń jazýynsha, Dýrres qalasyna jaqyn ornalasqan birneshe ǵımarat qıraǵan. El astanasy Tıranda da dúmpý sezilgen.
Italııalyq Sky TG24 telearnasy dúmpý Italııanyń keıbir ońtústik provıntsııalarynda da tirkelgendigin habarlady.
Olardyń aqparatynsha, Albanııada 150-den astam adam zardap shegip, kópshiligi úıindi astynda qalǵan.
Jer silkinisi jergilikti ýaqytpen 04.00 kezinde tirkelgen. AQSh-tyń geologııalyq qyzmetiniń málimeti boıynsha, zilzala kindigi Tıranǵa jaqyn ornalasqan Shıdjak qalasynan soltústik-batys baǵytta 10 km jerde, al oshaǵy 10 km tereńdikte ornalasqan.
