Albanııadaǵy tártipsizdikter jeti kún boıy tolastamaı tur
ASTANA. KAZINFORM — Albanııa astanasy Tıranada narazylyq bildirýshiler men polıtsııa arasyndaǵy qaqtyǵystardyń júrip jatqanyna jeti kún boldy.
Resmı málimetterge sáıkes, dúısenbi kúngi qaqtyǵystarǵa deıin 295 adam jaraqat alǵan, sonyń 186-sy quqyq qorǵaý organdarynyń qyzmetshileri. Narazylyq bildirýshiler polıtsııaǵa tas pen Molotov kokteılderin laqtyryp, pırotehnıkalyq quraldardy da qoldanyp jatyr, úkimet ǵımarattary men polıtsııa bólimshelerine shabýyl toqtamaı tur. Qaýipsizdik kúshteri sý shashatyn mashınalarmen, kózden jas aǵyzatyn gazben jáne rezeńke oqtarmen jaýap qaıtaryp júr.
Búgin premer-mınıstr Edı Rama Bilim mınıstrligine baryp, jergilikti orta mektepterdiń dırektorlarymen kezdesti.
Kezdesý barysynda Edı Rama mınıstrlikke shabýyl jasalǵanyn jáne keıbir narazylyq bildirýshiler polıtsııa qyzmetkerlerine tas laqtyryp, zorlyq-zombylyqqa barǵanyn atap ótti.
Úkimetti 2013 jyldan beri basqaryp otyrǵan Edı Rama qyzmetinen ketý týraly talaptardy taǵy da qabyldamady. Polıtsııa basshylyǵymen kezdesýde ol qaýipsizdik kúshterine laqtyrylǵan tasty kórsetip, «Memleket mynamen kelissóz júrgize bastaǵan sátte memleket qulaıdy» dep málimdedi. Premer-mınıstr bul oqıǵalardy «jaqsy úılestirilgen shabýyl» dep atady.
Qazirgi narazylyq tolqyny ýnıversıtetterdegi jaǵdaılarǵa, joǵary oqý aqysyna jáne sybaılas jemqorlyqqa qarsy stýdentterdiń narazylyq aktsııalary retinde bastalyp, keıin jappaı tártipsizdikterge ulasty.
