Albanııadaǵy sherýdiń aıaǵy polıtsııamen qaqtyǵysqa ulasty
ASTANA. KAZINFORM — Albanııa astanasy Tıranadaǵy úkimet pen bilim mınıstrligi ǵımarattarynyń aldyndaǵy jappaı sherýlerdiń arty quqyq qorǵaý organdarymen qaqtyǵysqa ulasty, dep habarlaıdy Kazinform agenttiginiń menshikti tilshisi.
Polıtsııa narazylyq bildirýshilerdi taratý úshin kózden jas aǵyzatyn gaz ben sý shashatyn qurylǵylardy qoldandy. Tıranadaǵy úkimet alańy keshe shıelenistiń ortalyǵyna aınalǵan.
Stýdent toptary men jas belsendiler uıymdastyrǵan narazylyq aktsııasy bastapqyda bilim berý júıesin reformalaýdy jáne jańa jumys oryndaryn ashýdy talap etken beıbit sherý bolatyn. Alaıda, tústen keıin jaǵdaı zorlyq-zombylyqqa ulasty.
Narazy top mınıstrlik ǵımaratyna jáne qaýipsizdik kúshterine tas, beton synyqtaryn laqtyrǵan. Jaýap retinde arnaıy kúshter bólimsheleri narazylyq bildirýshilerdi ortalyq alańnan shyǵarý úshin sý shashatyn qurylǵylar men kózden jas aǵyzatyn gazdy qoldandy. Jergilikti polıtsııanyń málimetinshe, 20-dan astam adam ustaldy, sherýshiler men quqyq qorǵaý organdary qyzmetkerleri arasynda zardap shekkender bar.
Eýropalyq baqylaýshylar Albanııadaǵy qazirgi tártipsizdikter Edı Rama basshylyq etetin úkimettiń saıasatyna degen qattalǵan áleýmettik narazylyqtyń jalǵasy dep jazyp otyr.
Sarapshylardyń pikirinshe, sherýge jastar arasyndaǵy jumyssyzdyq pen ınflıatsııanyń joǵary deńgeıi, ýnıversıtetterge qarjynyń az bólinýi jáne júıeli reformalardyń joqtyǵy, bıýdjet shyǵyndaryn baqylaýdy pysyqtaý jáne sybaılas jemqorlyqtyń órshýi sebep bolǵan.
Albanııa úkimeti konstrýktıvti dıalogqa daıyn ekenin bildirdi, sonymen birge quqyq qorǵaý organdaryna qarsy kúsh qoldanýdy aıyptady. Qaýipsizdik kúshteriniń laýazymdy tulǵalary polıtsııanyń áreketteri tek memlekettik nysandardy qorǵaýǵa jáne qoǵamdyq tártipti saqtaýǵa baǵyttalǵanyn atap ótti.
Qazirgi ýaqytta Tırana ortalyǵyndaǵy jaǵdaı quqyq qorǵaý organdarynyń baqylaýynda, al astananyń negizgi ákimshilik aýdandarynda patrýldeý kúsheıtilgen.
Eske sala keteıik, buǵan deıin Frantsııada oqýshylar kótergen másele saıası sıpat alǵanyn jazǵanbyz.
