Albanııadaǵy narazylyq: Premer-mınıstr otstavkaǵa ketýden bas tartty
ASTANA. KAZINFORM — Albanııanyń premer-mınıstri Edı Rama elde altynshy kún qatarynan jalǵasyp jatqan jappaı narazylyqtarǵa qaramastan, qyzmetinen ketýden bas tartty. Bul týraly ol jeksenbi kúni jarııalaǵan beıneúndeýinde aıtty.
Bastapqyda joǵary oqý oryndaryndaǵy bilim berý júıesine, oqý aqysynyń qymbattaýyna, sybaılas jemqorlyq pen jumyssyzdyqtyń ósýine baılanysty týyndaǵan narazylyqtar birtindep órship, úkimetke qarsy jappaı sherýlerge ulasty.
Albanııa stýdentteri 2013 jyldan beri premer-mınıstr qyzmetin atqaryp kele jatqan Edı Ramanyń otstavkaǵa ketýin, bilim berý salasyndaǵy reformalardy jáne boljamdy sybaılas jemqorlyq shemalaryn toqtatýdy talap etip otyr. Osyǵan baılanysty Tırana men eldiń basqa qalalarynda narazylyqtar ótip, sherýshiler men polıtsııa arasynda qaqtyǵystar boldy. Narazy top tas pen janǵysh qospasy bar bótelkeler laqtyryp, jarylǵysh buıymdar qoldanǵan, tosqaýyldardy órtep, Bilim mınıstrligi ǵımaraty men premer-mınıstr keńsesi ornalasqan aýdanǵa shabýyl jasaǵan. Polıtsııa narazylyq bildirýshilerdi taratý úshin kózden jas aǵyzatyn gaz, sý atqysh mashınalar men rezeńke oq qoldandy. Densaýlyq saqtaý mınıstrliginiń málimetinshe, tártipsizdikter bastalǵaly beri júzdegen adam zardap shekken, olardyń arasynda kóptegen polıtsııa qyzmetkeri bar.
Edı Ramanyń aıtýynsha, narazylyq aktsııalarynyń artynda Albanııanyń Eýropa odaǵyna qosylý jolyna kedergi keltirýge tyrysatyn «syrtqy kúshter» tur. Albanııa Eýropa odaǵyna 2030 jylǵa deıin múshe bolýdy maqsat etip otyr. Premer-mınıstr úkimet bıligi revolıýtsııa arqyly emes, saılaý nátıjesinde aýysýǵa tıis ekenin atap ótti. Sondaı-aq ol zorlyq-zombylyq el úkimetine emes, Albanııanyń eýropalyq bolashaǵyna qaýip tóndiretinin málimdedi.
Buǵan deıin Albanııa premer-mınıstri tártipsizdikterge syrtqy kúshterdi aıypty etip kórsetkeni habarlanǵan bolatyn.
