Albanııada zilzaladan qaza tapqandar sany 18 adamǵa jetti, 600-i zardap shekken
NUR-SULTAN. QazAqparat -Albanııada bolǵan jer silkinisinen kem degende 18 adam qaza tapty, dep habarlaıdy QazAqparat France Presse agenttigine silteme jasap.
Buǵan deıin Exit portaly 16 adam mert bolyp, 600 adam zardap shekkenin habarlaǵan. 43 adamdy úıindiler arasynan alyp shyǵýdyń sáti túsken.
El astanasy Tıranada 500-ge jýyq ǵımarat qıraǵan, sondaı-aq Dýrres qalasyna zor shyǵyn kelgen.
AQSh Geologııa qyzmetiniń málimdeýinshe, 6,4 magnıtýdaly zilzalanyń epıtsentri Tırananyń janyndaǵy Shıdjak qalasynan soltústik-batysqa qaraı 10 shaqyrymda bolǵan.
Zilzala oshaǵy 10 km tereńde ornalasqan.
Dúmpýdi Soltústik Makedonııa, Serbııa, Chernogorııa, Bosnııa jáne Gertsegovına, Grekııa, Horvatııa jáne Italııa turǵyndary da sezgen.
