Albanııada tártipsizdikke qatysqandarǵa 6 myń dollarǵa deıin aıyppul salynady
ASTANA. KAZINFORM — Albanııada jappaı tártipsizdikke ulasqan sherýge qatysqandarǵa 500 myń lekke deıin (shamamen 2,8 mln teńge) aıyppul salynady, dep habarlaıdy The Guardian basylymy.
Usynylǵan ózgerister ruqsat etilmegen jıyndarǵa qatysyp, polıtsııanyń sherýdi toqtatý talabyn oryndamaǵany úshin jáne jeke basyn jasyrǵany úshin salynatyn aıyppuldy kóbeıtýdi kózdeıdi. Atap aıtqanda, jeke basyn jasyryp, jıyndy taratý týraly polıtsııa talabyna baǵynbaǵandarǵa 50 myńnan 500 myń lekke deıin (2,8 mln teńgege deıin) aıyppul salynýy múmkin. Al basqa da birqatar quqyqbuzýshylyq úshin aıyppul mólsheri 10 myńnan 100 myń lekke deıin (558 myń teńgege deıin) belgilengen.
Zorlyq-zombylyq qaýpi tóngen nemese múlikke eleýli zııan kelý qaýpi bolǵan jaǵdaıda polıtsııa bilim berý, medıtsınalyq jáne memlekettik mekemeler mańyndaǵy jekelegen aýmaqtarda jıyn ótkizýge ýaqytsha tyıym sala alady. Budan bólek ınternette zorlyq-zombylyqqa úndeıtin jazbalarǵa qatysty da sharalar kózdelgen.
Bul ózgerister Albanııa astanasy Tıranada úkimetke qarsy narazylyqtar jalǵasyp jatqan tusta qabyldandy. Sońǵy kúnderi sherýshiler men qaýipsizdik kúshteri arasynda qaqtyǵystar bolyp, memlekettik jáne jeke menshik nysandaryna zııan keldi.
Albanııa premer-mınıstri Edı Ramanyń aıtýynsha, jańa talaptar tártipsizdiktiń aldyn alyp, keltirilgen zalaldy óteýdi kózdeıdi. Sondaı-aq ol narazylyq bildirýshilerdi kelissóz júrgizýge shaqyrdy.
Sondaı-aq Frantsııa Senaty da osyndaı zańnamalyq bastama kóterdi. 28 qazanda ol narazylyq aktsııalary kezinde keltirilgen zalal úshin, tipti shyǵynǵa tikeleı qatysy bolmasa da, sherýge qatysýshylarǵa aıyppul salýdy kózdeıtin zań jobasyn birinshi oqylymda maquldady.
Buǵan deıin Albanııanyń premer-mınıstri Edı Rama jappaı narazylyqtarǵa qaramastan, qyzmetinen ketýden bas tartqanyn habarlaǵan bolatynbyz.
