Albanııada stýdentter óz elinde 5 jyl jumys isteýge mindetteıtin zańǵa qarsylyq tanytty
TIRANA. QazAqparat - Albanııalyq medıtsına stýdentteri oqýyn aıaqtaǵan soń 5 jyl óz otanynda jumys isteýge mindetteıtin zańǵa qarsylyq bildirýde, dep habarlaıdy QazAqparat euronews.com saıtyna silteme jasap.
Tırana medıtsınalyq ýnıversıtetiniń stýdentteri parlament ǵımaraty aldyndaǵy narazylyq sherýinde jańa oqý jylyna boıkot jarııalady. Olar oqýyn bitirgen soń Albanııada 5 jyl jumys isteýge mindetteıtin zańnyń joıylýyn talap etip otyr.
«Bul zań jobasy ádiletsiz jáne konstıtýtsııaǵa qaıshy, ol adam quqyǵyn buzady», - deıdi narazylyq bildirýshilerdiń biri.
Bilim mınıstrliginiń mundaı sheshim qabyldaýynyń basty sebebi – aqyl-oıdyń ketýi. Eýropadaǵy albanııalyq dárigerler qaýymdastyǵy jarııalaǵan málimetterge sáıkes, tek sońǵy onjyldyqta 3040 dáriger elden kóship ketken.
«Zań konstıtýtsııaǵa qaıshy emes, zań eshkimdi májbúrlemeıdi. Zań tańdaý beredi», - deıdi Albanııanyń Bilim jáne sport mınıstri Evıs Kýshı.
Alaıda bul sheshim medıtsına stýdentterine unamady. Olardyń aldynda eki nusqa tur: ne kelisimshartqa otyrý, ne oqý aqysyn tolyǵymen tóleý.
Dárigerler stýdentterdi Albanııada qaldyrýdyń balama joldaryn tabý kerek deıdi.
«Stýdentterge jumys isteýge jaǵdaı jasalýy kerek. Mundaı sharalar búkil álemde qabyldanýda», - deıdi dáriger Kıta Sallabanda.
Bir aıdan astam ýaqytqa sozylǵan narazylyqtar ázirge nátıje bermedi: Parlament qazan aıynda jańa oqý jylynan bastap qoldanysqa engizilýi tıis zań jobasyn maquldady.
