Albanııada parlamenttik saılaý aıaqtaldy

ASTANA. KAZINFORM – Jeksenbi kúni albandyqtar eldiń Eýropalyq Odaqqa kirý jónindegi ambıtsııasyna baılanysty kúrdeli saılaýaldy naýqanynan soń parlament saılaýynda daýys berdi, dep habarlaıdy Kazinform agenttiginiń menshikti tilshisi.

Saılaý ýchaskeleri jeksenbi kúni jergilikti ýaqyt boıynsha keshki saǵat 19.00-de jabyldy jáne 140 zań shyǵarýshy tórt jyldyq merzimge tańdalatyn saılaýda daýystardy sanaý 48 saǵat ishinde aıaqtalady dep kútilip otyr.

Jappaı emıgratsııaǵa baılanysty 2,8 mln halqy bar elde daýys berý quqyǵyna ıe nebári 3,7 mln-ǵa jýyq saılaýshy bar.

Alǵash ret sheteldegi alban dıasporasy quramyndaǵy azamattar bıýlletenderin poshtamen jiberý arqyly daýys berdi. Bul joly olardyń sany shamamen 191 myń boldy.

Qazirgi premer-mınıstr Edı Ramanyń Sotsıalıstik partııasy konservatıvti qarsylastarmen kúrese júrip, ambıtsııalyq ýádesin oryndaı otyryp, EO músheligin bes jyl ishinde qamtamasyz ete alatynyn málimdedi.

Sheteldegi saılaýshylar úshin daýys berý múmkindiginiń ashylýy jańa partııalardyń paıda bolýy, úgit-nasıhat jumystarynyń áleýmettik jelilerge aýysýy jáne Albanııanyń jaqynda «TikTok» jelisine tyıym salýymen birge protsestiń turaqsyzdyǵyn kúsheıtti.

Daýys berý búkil el boıynsha kandıdattar men jaqtastar arasyndaǵy birneshe qaqtyǵysty qospaǵanda, negizinen beıbit túrde ótti. Bılik saılaýshylardyń aldyn ala qatysýyn 41,4% dep baǵalady, bul 2021 jylmen salystyrǵanda 4% tómen.

- Negizinen, birneshe jaǵdaıdy qospaǵanda, protsess erejeler men standarttarǵa sáıkes keldi, - dep málimdedi Ortalyq saılaý komıssııasynyń basshysy Ilırdjan Chelıbashı.

Ótken jyldyń qazan aıynda EO-ǵa múshelik kelissózin bastaǵan 60 jastaǵy Edı Rama saılaýaldy naýqanynda ınfraqurylym men ádilet reformasy boıynsha jetistikterin atap ótti.

EO Syrtqy ister jáne qaýipsizdik saıasaty jónindegi Joǵarǵy komıssary Kaıa Kallas Albanııany eldiń EO-ǵa músheligine jol salý úshin ásirese memlekettik basqarý jáne sybaılas jemqorlyqpen kúres salalaryndaǵy reformalardy jalǵastyrýǵa shaqyrdy.

Edı Ramanyń basty básekelesi – burynǵy prezıdent jáne premer-mınıstr, 80 jastaǵy Salı Berısha Albanııa áli de EO músheligine daıyn emes dep sanaıdy. Ol naýqandy AQSh prezıdenti Donald Tramptyń «Albanııany qaıtadan uly etemiz» degen uranymen bastady, biraq sońynda «Uly Albanııaǵa» toqtady.

Osyǵan deıin Albanııada 3,7 mln-nan astam saılaýshy jańa parlament quramyn anyqtaıtyny týraly jazdyq.