Alaıaqtyqty kásip etip kelgen qyzylordalyq qolǵa tústi
QYZYLORDA. QazAqparat-Qyzylordalyq polıtseıler adamdardyń senimine kirip, iri kólemdegi aqshalaryn jymqyryp kelgen 35 jastaǵy er adamdy qolǵa túsirdi, dep habarlady QazAqparat oblystyq ІІD-ge silteme jasap.
Atalǵan azamattyń ústinen Qyzylorda qalasynyń 11 turǵyny shaǵymdanǵan. Ol birine júrgizýshi kýáligin jasatyp beretinin aıtsa, endi birine jumysqa turǵyzýǵa, arzan baǵaǵa jer nemese avtokólik taýyp berýge, kólikti tez arada tirkeýden shyǵaryp berýge ýáde etip, aqshalaryn alyp, izin sýytyp otyrǵan. Azamattarǵa keltirilgen jalpy shyǵyn kólemi 1 mıllıon 611 myń teńgeni quraǵan.
Іri kólemdegi shyǵyndy azamat S.A.-ǵa keltirgen. 2016 jyly onyń «Mitsubishi Galant» markaly avtokóligin satyp almaq bolyp ýádelesedi. «Anama kórsetip keleıin» degen jeleýmen oqıǵa ornynan boı tasalap, quny 720 000 teńge turatyn bireýdiń múlkin zańsyz ıemdengen.
Qazirgi tańda atalǵan azamattyń ústinen Qazaqstan Respýblıkasy Qylmystyq kodeksiniń 190-baby 2-bóliginiń 2-tarmaǵy negizinde qylmystyq is qozǵalyp, sotqa deıingi tergep-tekserý amaldary júrgizilýde. Onyń alaıaqtyq áreketinen zardap shekken basqa da qala turǵyndarynyń jeke basy anyqtalýda. Eger de onyń kinási tolyq dáleldense, onda múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp tórt myń aılyq eseptik kórsetkishke deıingi mólsherde aıyppul salýǵa, ne sol mólsherde túzeý jumystaryna, ne tórt jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa jazalanady.
Aıta keterlik jaıt, bul qylmystardyń tirkelýine turǵyndardyń nemese jábirlenýshilerdiń áleýmettik jaǵdaılaryn túzep berýge, atap aıtqanda, jumysqa ornalasý, memlekettik járdemaqylardy taǵaıyndaý, jeńildetilgen paıyzben nesıe alyp berý, jer nemese páter alý jumystaryna kómektesýge ýáde etken azamattardyń sózine aldanyp, ońaı jolmen óz jumystaryn bitirýge talpynýlary sebep bolyp otyr.
