Alaıaqtyqpen aınalysqan saıt «Astana Opera» qoıylymdaryna bılet satýda
ASTANA. QazAqparat - Internet jelisinde «Astana Opera» MOBT spektaklderi men kontsertterine jalǵan bıletter satý boıynsha alaıaqtyqpen aınalysatyn saıt paıda boldy, dep habarlaıdy atalmysh teatrdyń baspasóz qyzmeti.
Teatrda https://astana-opera.kz/ jalǵan saıtynan bıletter alǵan elorda turǵyndary alaıaqtardyń qurbany bolǵany týraly habarlandy. "Astana Operanyń" basshylyǵy barshany saq bolyp, bıletterdi tek teatrdyń https://astanaopera.kz/ resmı saıtynan satyp alýǵa shaqyrady, sebebi sol bıletter ǵana jaramdy bolyp tabylady.
"Qazirgi ýaqytta oryn alǵan jaǵdaıdy zań sheńberinde turaqtandyrýǵa baǵyttalǵan áreketter men jalǵan saıttyń ıelerin anyqtaý boıynsha shuǵyl sharalar qabyldanýda", - dep atap ótti teatr dırektsııasy.
Opera jáne balet ónerine degen qyzyǵýshylyq jyl sanap artyp, "Astana Opera" memlekettik opera jáne balet teatrynyń barlyq qoıylymdary úlken anshlagpen ótetindigin aıta ketken jón.
