Alaıaqtyq jasaǵan eki basshyǵa iri kólemde aıyppul salyndy
«Sybaılas jemqorlyqqa qarsy is-qımyl ulttyq bıýrosynyń Aqtóbe oblysy boıynsha departamenti buryn Aqtóbe qalasy Astana aýdanynyń № 2 qalalyq polıtsııa bólimi bastyǵynyń orynbasary, polıtsııa maıory
E. Ánetbaevqa, osy bólimniń aǵa jedel ýákili, polıtsııa kapıtany A. Sholaqovqa jáne osy bólimniń jedel ýákili, polıtsııa aǵa leıtenanty E. Qaldybaevqa qatysty sotqa deıingi tergeýdi aıaqtady», delingen habarlamada.
Atalǵan tulǵalar «A» azamatyna qatysty qylmystyq isti qysqartý týraly óz quzyretine kirmeıtin máseleni sheshý úshin aldaý jolymen D. Ryspaǵambetovten 300 myń teńge alǵan.
29 mamyrda Aqtóbe qalasynyń № 2 sotynda olar alaıaqtyq jasaǵany úshin memlekettik qyzmette laýazymdardy atqarý quqyǵynan ómir boıyna aıyryla otyryp, E. Ánetbaevqa - 2,9 mln teńge, A. Sholaqovqa - 3 mln teńge jáne E. Qaldybaevqa - 2,5 mln teńge aıyppul salyndy. Sottalǵandar arnaıy polıtsııa shenderinen aıyryldy.
Bir kún keıinirek, 30 mamyr kúni Pavlodar qalasynyń №2 sotynyń úkimimen oblystyq Tótenshe jaǵdaılar departamenti basqarmasynyń burynǵy bastyǵy S. Ysqaqov alaıaqtyq jasaǵany úshin kináli dep tanyldy.
Ulttyq bıýronyń Pavlodar oblysy boıynsha departamentiniń sotqa deıingi tergeý materıaldaryna sáıkes S. Ysqaqov saýda úıiniń ókilinen aldaý jolymen 500 myń teńge alǵan. Aqsha ákimshilik quqyq buzýshylyq týraly materıaldy mamandandyrylǵan ekonomıkalyq sotqa jibermeý týraly óziniń quzyretine kirmeıtin máseleni sheshýi úshin alynǵan.
Ol alaıaqtyq jasaǵany úshin memlekettik qyzmette laýazymdardy atqarý quqyǵynan ómir boıyna aıyryla otyryp, 5 mln teńge kóleminde aıyppul salyndy.
Sondaı-aq ol azamattyq qorǵaý podpolkovnıgi arnaıy sheninen aıryldy.
Sot E. Ánetbaevqa, A. Sholohovqa jáne E. Qaldybaevqa qatysty úkim zańdy kúshine engen kúnnen bastap on bes táýlik ishinde, S. Ysqaqovqa - bir aı ishinde aıyppul tóleý merzimin belgiledi. Sot jazalanǵandardyń aıyppuldaryn tólemegen jaǵdaıda jaza bas bostandyǵynan aıyrýǵa aýystyrylatyny túsindirildi.