Alaıaqtyq jasady dep aıyptalǵan aqtóbelik depýtat kinásin moıyndady
AQTÓBE. QazAqparat - Aqtóbe oblystyq máslıhatynyń depýtaty Baqytjan Erjanov kinásin moıyndady, dep habarlaıdy QazAqparat tilshisi.
Aqtóbe oblystyq máslıhat depýtaty, kásipker Baqytjan Erjanov qazan aıynda qamaýǵa alynǵan bolatyn. Buǵan deıin habarlaǵanymyzdaı, oǵan Qylmystyq kodekstiń «Alaıaqtyq», «Bılik ókiline qatysty kúsh qoldaný», «Densaýlyqqa qasaqana asa aýyr zııan keltirý» baptary boıynsha aıyp taǵylyp otyr.
Qylmystyq is Hromtaý aýdandyq sotynda qaralady. Qazirgi kúni depýtat ýaqytsha tergeý abaqtysynda otyr.
Іs materıaldaryna súıensek, kásipker Baqytjan Erjanovtyń qorǵaýshylary kináni moıyndaý týraly protsessýaldy kelisim jáne isti kelisimdik is júrgizýde qaraý týraly ótinishhat jiberdi. Protsessaldy prokýrorlar men aıyptalýshy Baqytjan Erjanovtyń arasynda kináni moıyndaý týraly protsessýaldy kelisim jasalǵan.
Aıta keteıik, «Gúlsim» sharýa qojalyǵynyń basshysy Baqytjan Erjanov 2015 jyly óziniń jubaıy L.Erjanovadan 167 bas asyl tuqymdy iri qara satyp aldy. Maldyń quny 51 mıllıon teńgeden astam qarjyǵa baǵalanǵan. Sóıtip ol «Jantizer» ShQ-dan mal satyp aldym» degen qujatty Aqtóbe oblystyq aýyl basqarmasyna tapsyrady, sýbsıdııa alýǵa jalǵan qujattar beredi. Sýbsıdııa mólsheri - 25 718 000 teńge. Depýtat B.Erjanov osy jolmen 2016 jyly taǵy da 103 bas iri qara «satyp alyp», 1 854 000 teńge jymqyrǵan. Keıin «KazPromStroıGrýpp» JShS-nyń dırektory Baqytjan Erjanov 3 myń iri qara malǵa arnalǵan bordaqylaý alańyn salý úshin «Jantizer» ShQ-nyń basshysy L.Erjanovamen 209 797 850 teńgege kelisimshart jasaıdy. Sol kezde «Jantizer» ShQ-nyń esepshisi A.Ótepova «KazAgroMarketıng» AQ-nyń Aqtóbe oblysy boıynsha fılıalynan sýbsıdııa alý týraly qujatty daıyndap, 102 353 256 teńgeni aldy.
Іs materıalyna súıensek, aıyptalýshy Baqytjan Erjanov Hromtaý aýdandyq prokýratýrasynyń prokýror J.Espanovqa telefon shalyp, qorqytqan. Aıyptalýshy kásipker Hromtaý aýdany, Abaı selolyq okrýginiń mańaıyndaǵy egistikke baryp, beıtanys S.Ketebaevpen kezdesedi. Sol jerde shóp býýshynyń jumysy týraly sóılesip, tóbelesip qalǵan. Keıin densaýlyǵyna aýyr dene jaraqatyn salǵany anyqtaldy.
Bar kináni moıyndap, prtsessýaldyq kelisim suraǵan aıyptalýshy Baqytjan Erjanovtyń ótishini qanaǵattandyrylyp, jańa protsessýaldy kelisim jasaý úshin is Hromtaý aýdandyq prokýratýrasyna qaıtaryldy. Al aıyptalýshy B.Erjanovty kúzetpen ustaý túrindegi bultartpaý sharasy ózgerissiz qaldyryldy.
