Alaıaqtyq pen urlyq órship tur - Kóliktegi ІІD
ASTANA. QazAqparat - QR ІІM Kóliktegi ІІD qyzmet kórsetý aýmaǵynda qoǵamdyq tártip qaýipsizdigin qamtamasyz etý úshin bar kúshterin salýda. Keıbir qylmys túrleri asa órship tur, atap aıtqanda, alaıaqtyq pen urlyq, dep habarlaıdy Kóliktegi ІІD baspasóz qyzmeti.
Túsindirý jumystary jáne basqa da aldyn alý sharalaryna qaramastan, halyq arasyndaǵy mundaı qylmys túrleri keń taraǵan. Derekterge súıensek, adamdar ózderiniń múlik qaýipsizdigine nemquraıly qaraı otyryp, alaıaqtardyń quryǵynda ketedi. Osy máselege baılanysty kún saıyn ár túrli aryzdar kelip túsýde.
Máselen, «Almaty-Máskeý» baǵytyndaǵy jolaýshylar poıyzynda Almaty qalasynyń turǵyny 150 myń teńgeden astam aqshasynan aıyrylǵan. 2015 jylǵy 10 qańtarda Almaty-2 st. ishki ister jelilik bólimine 1964 j.t. Almaty qalasynyń turǵyny «B» esimdi azamatsha shaǵymdanyp kelgen. Onyń aıtýynsha, «Almaty-Máskeý» baǵytyndaǵy jolaýshylar poıyzynda belgisiz jigit Máskeý qalasynan halyqtyq tutyný taýarlaryn alyp kelemin degen syltaýmen aryz berýshiniń 31 myń 200 rýblin jáne 4 myń teńgesin ıemdenip ketken. Jedel-izdestirý sharalarynyń nátıjesinde Almaty-2 st. ІІJB KPb qyzmetkerleri 1989 j.t. Qyzylorda oblysy turǵyny, «N» esimdi azamatty ustady. Zattaı dálelder tárkilenip alyndy. Sotqa deıingi tergeý amaldary júrgizilýde.
Kóliktegi ІІD Krımınaldyq polıtsııa basqarmasynyń bastyǵy polıtsııa polkovnıgi Dáýlet Maqsutov: «Bul qylmystyń bir ereksheligi, azamattar qylmyskerlerge aqsha qarajattary men baǵaly zattaryn óz erikterimen tabystaıdy. Alaıaqtar ózderiniń usynystarynyń tıimdiligine sendire biledi. Olarǵa ásirese, tez sengish nemese ońaı jolmen materıaldyq paıda tabýdy kózdeıtin adamdar aldanyp qalyp jatady»- dep atap ótti.
Sondaı-aq, 10.01.16 jyly Aqtóbe st. Іshki ister jelilik basqarmasyna 1990 j.t. Atyraý oblysynyń turǵyny shaǵymdanyp kelgen. Onyń aıtýynsha, osy jylǵy 10 aqpan kúni «Atyraý-Aqtóbe» baǵytyndaǵy jolaýshylar poıyzynda aryz berýshiniń sómkesinen 100 myń teńge men jeke qujattary bar ámııany joǵalǵan. Jedel-izdestirý jumystary nátıjesinde 1989 j.t. Aqtóbe qalasynyń turǵyny ustaldy. Zattaı dálelder tárkilenip alyndy. Sotqa deıingi tergeý amaldary júrgizilýde.
Azamattar alaıaqtyq pen urlyq qaýipterinen saqtaný úshin muqııat bolǵandary jón. Mundaı qylmystar men quqyqbuzýshylyqtardyń aldyn alýǵa beı-jaı qaramaǵan durys.
