Alaıaqtyǵy úshin sottalǵan áıel kolonııadaǵy tanysyn san soqtyryp ketti
ÓSKEMEN. QazAqparat - Qalalyq sot buryn isti bolyp, jaqynda ǵana bostandyqqa shyqqan Asambaevaǵa qatysty taǵy úkim shyǵardy. Bul joly ol memlekettik organdardyń laýazymdy tulǵalaryna para berýge arandatty dep aıyptalyp otyr, dep habarlaıdy QazAqparat tilshisi.
Asa iri kólemde bóten múlikti jymqyrǵany úshin túzetý mekemelerinde jazasyn ótep júrgen Asambaeva sottalýshy Bekjanovpen tanysqan.
Olardyń arasynda senimdi qarym-qatynastar ornaǵan. Asambaeva jańa «dosyna» 15 kúnnen keıin bostandyqqa shyǵatynyn jáne onyń jazasyn shartty túrde óteýge aýystyrý máselesin sheshýge tyrysatynyn aıtqan.
Asambaeva (aldaý jolymen aqsha jymqyrý maqsatynda) Bekjanovty merziminen buryn bosap shyǵý úshin memlekettik organdardyń laýazymdy tulǵalaryna 6 myń dollar kóleminde para berýge arandatqan.
Bostandyqqa shyqqan Asambaeva Bekjanovtyń ápkesinen 1 mıllıon teńge alý barysynda tutqyndaldy.
Sot úkimimen ol para berýge arandatý jáne alaıaqtyq jasaǵany úshin aıypty dep tanyldy. Úkimderdi jınaqtaı kele, aldyńǵy úkimmen qaıtalanatynyn eskere otyryp, oǵan 4 jylǵa bas bostandyǵynan aıyrý, múlkin tárkileý jáne memlekettik organdar men jergilikti ózin-ózi basqarý organdarynda jumys isteýge ómir boıy tyıym salý jazasy taǵaıyndaldy.
Sot úkimi ázirge zańdy kúshine engen joq.
