Alaıaqtyqtyń jańa túrine baılanysty ІІM qazaqstandyqtarǵa úndeý jasady

ASTANA. KAZINFORM — Іshki ister mınıstrligi sońǵy kezderi alaıaqtyq oqıǵalarynyń jıilep ketýine baılanysty azamattardy shetelde jumys izdeý jáne Qazaqstanda turǵyn úıdi jalǵa alý kezinde asa muqııat bolýǵa shaqyrdy. Bul týraly Polisia.kz jazdy.

 Alaıaqtar ózderin kadrlyq agenttik, týroperator nemese jeke tulǵa retinde tanystyryp, azamattarǵa kelesi «qolaıly» usynystardy alǵa tartady:

— shetelde joǵary jalaqy tólenetin, til bilý men jumys tájirıbesin qajet etpeıtin jumys oryndary;

— páterlerdi, demalys oryndaryn jáne týrıstik qyzmetterdi tómen nemese naýqandyq baǵamen jalǵa berý.

Mundaı usynystarǵa senip, aldyn ala tólem jasaǵan azamattar alaıaqtardyń qurbanyna aınalyp, olardyń izin taba almaı qalady.

Alaıaqtyq áreketterdiń negizgi belgileri:

— qyzmet kórsetý nemese qujat rásimdeý úshin aldyn ala tólem talap etilýi;

— kompanııanyń resmı saıttarynyń, zańdy mekenjaıynyń jáne tıisti lıtsenzııasynyń bolmaýy;

— tek messendjer arqyly baılanys ornatyp, jeke kezdesýden bas tartýy;

— jalǵan kelisimsharttar, qoldan jasalǵan pikirler men feık saıttardy qoldanýy.

Alaıaqtyqtyń aldyn alý úshin ІІM kelesi keńesterdi usynady:

— kompanııanyń zańdy tirkelgenine kóz jetkizińiz: lıtsenzııasy, tirkeý nómiri men BSN-i bolýy tıis;

— resmı kelisimshartsyz eshqashan eshkimge aqsha aýdarmańyz;

— tym tıimdi bolyp kórinetin usynystarǵa kúmánmen qarańyz;

— jeke basyńyzǵa qatysty málimetterdi, onyń ishinde tólqujat kóshirmesin beıtanys adamdarǵa bermeńiz;

— shetelde jumysqa ornalasý nemese turǵyn úı jaldaý úshin tek senimdi ári tekserilgen platformalardy paıdalanyńyz.

— Eger siz alaıaqtyqtyń qurbany bolsańyz, Іshki ister mınıstrligi dereý polıtsııaǵa júginip, oqıǵa jaıynda habarlaýdy suraıdy. Sizdiń aryzyńyz qylmyskerlerdi jaýapkershilikke tartýǵa jáne bolashaqta osyndaı quqyq buzýshylyqtardyń aldyn alýǵa septigin tıgizedi, — dep eskertti vedomstvodan.

Eske sala keteıik, buǵan deıin advokat alaıaqtyq boıynsha mobıldi operatorlardyń jaýapkershiligin kúsheıtý kerek degen usynys aıtqanyn jazǵan edik.