Alaıaqtyqtan zardap shekken azamattarǵa qarajatty qaıtarý isi jeńildeıdi
ASTANA.KAZINFORM - Qazaqstan Ulttyq Banki qarjy naryǵyndaǵy alaıaqtyq operatsııalarǵa qarsy is-qımyl sharalaryn kúsheıtýge, Ulttyq Antıfrod-ortalyqtyń fýnktsıonalyn keńeıtýge, alaıaqtyq áreketterden zardap shekken azamattarǵa qarajatty qaıtarý isin jeńildetýge baǵyttalǵan zańnamalyq túzetýler qabyldanǵanyn habarlady.
Endi alaıaqtyq belgisi bar tranzaktsııalar boıynsha buǵattalǵan qarajatty prokýrordyń sanktsııasymen tergeý organdaryna habarlaý arqyly qaıtarýǵa bolady (buryn sot sheshimi qajet bolǵan). Budan basqa, Ulttyq Antıfrod-ortalyqta zańsyz operatsııalarǵa tartylǵan kúdikti tólem kartalary men elektrondyq ámııandardyń derekqory qurylady.
Sonymen qatar, banktik shoty alaıaqtyq kúdikke baılanysty buǵattalǵan tulǵalar úshin zeınetaqy, shákirtaqy, járdemaqy nemese jalaqy aıasynda júzege asyrylatyn áleýmettik tólemder men ózge de aqsha aýdarymdaryna qoljetimdilik saqtalady.
Qarjy uıymdary kúdikti operatsııalarǵa sapaly taldaý júrgizýi úshin alaıaqtyq belgisi bar tranzaktsııalardy buǵattaý merzimi 3 jumys kúninen 5 jumys kúnine deıin uzartyldy.
Sondaı-aq Qazaqstanda «dropperlik» úshin qylmystyq jaýapkershilikti engizý, ıaǵnı bank kartasynyń nemese shot derekterin alaıaqtarǵa berý – mańyzdy zańnamalyq norma sanalady.
– Bul ózgerister aldaý áreketterine tezirek jaýap berýge, alaıaqtyqpen, esirtki saýdasymen, qarjy pıramıdalarymen jáne zańsyz oıyn bıznesimen tıimdi kúresýge múmkindik beredi. Bizdiń maqsatymyz – Qazaqstanda alaıaqtyq jáne ózge de zańsyz operatsııalarǵa qarsy is-qımyldyń tıimdi júıesin qurý, osy qaýip-qaterlerge aldyn ala shara qabyldaý» - dep ótedi Ulttyq Bank Tóraǵasynyń orynbasary Berik Sholpanqulov.
Budan basqa, Ulttyq Antıfrod-ortalyq óz bazasyn Bas prokýratýramen, Ulttyq qaýipsizdik komıtetimen, Tsıfrlyq damý, ınnovatsııalar jáne aeroǵarysh ónerkásibi mınıstrligimen jáne mobıldi operatorlarmen biriktiredi.
Antıfrod-ortalyqty damytýdyń kelesi kezeńi banktik qosymshalardaǵy kúdikti belsendilikti anyqtaıtyn jáne bankaralyq deńgeıde kúmándi aýdarymdardy buǵattaıtyn jasandy ıntellekt tehnologııasyn engizý bolady.
Qazir Ulttyq Banktiń Antıfrod-ortalyǵyna bankter, mıkroqarjy uıymdary, telekom-operatorlar men memlekettik organdardy qosa alǵanda 200-den astam qatysýshy qosylǵan. 80 myńnan astam oqıǵa tirkeldi, sonyń nátıjesinde 3 mlrd teńge buǵattaldy. Ulttyq Banktiń Antıfrod-ortalyǵy 2024 jyly iske qosyldy.
Aıta keteıik, Astanada eki alaıaq azamat birneshe jyl boıy ózin memlekettik baǵdarlama ókili retinde kórsetip, adamdardy aldap kelgeni belgili boldy.
Internettegi alaıaqtardan qalaı qorǵanýǵa bolatynyn jazǵan edik.