Alaıaqtyqtan qorǵaý: resmı uıymdar qońyraýy tańbalanatyn boldy
ASTANA. KAZINFORM – Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev alaıaqtyqtan qorǵaý úshin qandaı sharalar kózdelgenin aıtyp berdi.
Búgin Májilis telekommýnıkatsııalar naryǵyn jáne derekterdi óńdeý ortalyqtaryn damytý máseleleri boıynsha ózgerister men tolyqtyrýlar engizý týraly zań jobasyn birinshi oqylymda maquldady. Zań jobasy 116 túzetýden turady jáne baılanys qyzmetteriniń sapasy men qoljetimdigin arttyrý, telekommýnıkatsııa ınfraqurylymyn damytý, baılanys jelilerindegi alaıaqtyqpen kúresý baǵyttaryn qamtıdy.
Zań jobasyndaǵy úshinshi blok telekom-ınfraqurylymdy qorǵaýǵa jáne alaıaqtyqpen kúreske arnalǵan.
– Data-tsentrlerdi strategııalyq nysandar qataryna engizý jáne olardy salý nemese iske qosý kezinde habarlaý tártibin engizý usynylady. Bul baqylaýdy kúsheıtip, derekter qaýipsizdigin jáne ınfraqurylymnyń turaqtylyǵyn arttyrady. Internet jelisine jáne IP-telefonııaǵa qol jetkizý qyzmetterin lıtsenzııalaý talaptary jańartylyp jatyr, – dedi Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev jańa zań tanystyrylymynda.
Azamattardy telefon alaıaqtyǵynan qorǵaý úshin zańdy tulǵalardan qońyraýlar tańbalanatyn bolady. Bul abonentterge resmı qońyraýlardy kúdiktilerden ajyratýǵa múmkindik beredi.
– Abonenttik nómir men uıaly telefondardy jaqyn týystarynan basqa úshinshi tulǵalarǵa berýge tyıym salynady. Bıometrııalyq aýtentıfıkatsııa boıynsha normalar Tsıfrlyq kodekske sáıkes keltirilip jatyr. Sondaı-aq baılanys quraldaryn verıfıkatsııalaý arqyly tirkeý rásimin jetildirý kózdelgen. Bul zańsyz ákelingen quraldardy paıdalanýdy azaıtady, IMEI-di aýystyrý arqyly jasalatyn alaıaqtyq táýekelderin tómendetedi, – dedi sala mınıstri.
Aıta keteıik, Qazaqstanda poıyzdar men ushaqtarda ınternet qoljetimdi bolady.
Sonymen birge, eGov, e-Otinish qyzmetteri men Aitu messendjeri tarıfsiz qoljetimdi bolmaq.
