Alaıaqtyqpen kúres: Baılanys operatorlaryna jańa talaptar engizildi

ASTANA. KAZINFORM — Qazaqstan telekommýnıkatsııa salasynda óńirlik kóshbasshy pozıtsııasyn nyǵaıtyp keledi. Bul týraly Úkimet otyrysynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi. 

— Alaıaqtyqqa qarsy kúresti kúsheıtý maqsatynda mınıstrlik baılanys operatorlaryna jańa talaptardy engizdi. Atap aıtsam, abonentterdi anyqtaý úshin bıometrııalyq sáıkestendirý júıesi iske qosylyp jatyr. Frod nemese alaıaqtyq ruqsat etilmegen baılanys trafıgine teńestirildi. Baılanys operatorlarynyń jáne Ulttyq banktiń antıfrod júıeleri arasyndaǵy ózara áreket etý tártibi bekitildi. GSM-shlıýzderdi, ıaǵnı sımbokstardy elge ákelý jáne tirkeý erejeleri qabyldandy. Bir abonenttiń atyna tirkeletin telefon nómirleriniń sany shekteldi, — dedi Jaslan Mádıev.

Onyń aıtýynsha, qabyldanǵan sharalardyń nátıjesinde 2024 jyldyń basynan bastap 30 mıllıonnan astam kúdikti telefon qońyraýy buǵattaldy.

— Osylaısha, Qazaqstan telekommýnıkatsııa salasynda óńirlik kóshbasshy pozıtsııasyn nyǵaıtyp keledi. Іske asyp jatqan jobalar búkil halyq úshin sapaly ınternet pen tsıfrlyq qyzmetterdi qoljetimdi etip qana qoımaı, elimizdiń tranzıttik múmkindikterin arttyryp, tsıfrlyq ekonomıkanyń turaqty damýyna negiz qalaıdy, — dedi mınıstr.

Buǵan deıin habarlanǵandaı, 2027 jyldyń sońyna deıin halyqtyń 100 paıyzy ınternetpen qamtylady.