Alaıaqtyqpen 6 adamnyń 63 mln teńgesin jymqyrǵan kúdikti Reseıde ustaldy

ASTANA. KAZINFORM – Reseıden asa iri mólsherde birneshe márte alaıaqtyq jasady degen kúdikti taǵy bir azamat ekstradıtsııalandy. Bul týraly Qazaqstan Bas prokýratýrasynyń baspasóz qyzmeti habarlady. 

Ol 2022–2023 jyldary Aqtaý qalasynda kásipkerlikke ınvestıtsııa salamyn dep tanystarynan iri kólemde aqsha qarajatyn alyp, joǵary paıda ýáde etken. Alaıda ýádelerin oryndamaı, alynǵan qarajatty óz qajetine jaratqan. Kúdiktiniń qylmystyq áreketteriniń saldarynan 6 qazaqstandyq azamatqa jalpy somasy 63 mıllıon teńgeden astam zalal kelgen.

Qylmys jasaǵannan keıin ol jasyrynyp, sol sebepti oǵan halyqaralyq izdeý jarııalanǵan. Ótken jyldyń qarashasynda kúdikti Ekaterınbýrg qalasynda ustalyp, Qazaqstan Respýblıkasynyń Bas prokýratýrasynyń suraýy boıynsha elge ekstradıtsııalandy.

Qazirgi ýaqytta kúdikti tergeý ızolıatoryna qamaýǵa alyndy. Aıyptalǵan qylmysty jasaǵany úshin múlki tárkilenip, 5 jyldan 10 jylǵa deıin bas bostandyǵynan aıyrý jazasy qarastyrylǵan.

Esterińizge sala keteıik, jyl basynan beri Qazaqstanǵa alaıaqtyq úshin Reseıden 5 adam, Germanııa, Polsha, Serbııa, Saýd Arabııasy, Qyrǵyz Respýblıkasy jáne Belarýsten 1 adamnan, barlyǵy 11 adam ekstradıtsııalanǵan.