100 mln teńgeden astam qarjyny jymqyrdy degen kúdikti Germanııadan ekstradıtsııalandy

ASTANA. KAZINFORM —  Bas prokýratýranyń qyzmetkerleri Qazaqstan Respýblıkasy Syrtqy ister mınıstrliginiń kómegimen Germanııa Federatıvtik Respýblıkasynan asa iri mólsherdegi alaıaqtyq jasaǵan kúdiktini qylmystyq jaýaptylyqqa tartý maqsatynda ekstradıtsııalady.

Atalǵan tulǵa 2023 jyldyń qańtarynda eki sybaılasymen aldyn ala sóz baılasý arqyly jalǵan kompanııalardy qurý jolymen qazaqstandyq jumsaq bıdaıdyń iri partııasyn jetkizip beremin dep kásipkerdi aldap, jalpy somasy 100 mln teńgeden astam qarajatyn ıemdengen.

Qylmystyq qýdalaý organdary kúdiktilerdiń birin izin sýytpaı ustady, al qalǵan ekeýi jasyrynyp, halyqaralyq izdeýge jarııalandy.

2024 jyldyń qazanynda izdeýde júrgenderdiń biri Germanııanyń Nıýrnberg qalasynda ustalyp, odan keıin Bas prokýratýranyń suraýy boıynsha eline ekstradıtsııalandy.

Qazir ol tergeý ızolıatoryna qamaldy.

Aıyptalǵan qylmysty jasaǵany úshin múlkin tárkilenip, 5 jyldan 10 jylǵa deıingi merzimge bas bostandyǵynan aıyrý jazasy kózdelgen.

Aıta ketelik esirtki kontrabandasymen aınalysty degen kúdikti Reseıden ekstradıtsııalanǵan edi.